Siglir tar il cuntegn

Header

audio
Spleia Tambo sa legran da puspè pudair avrir las pistas
Or da Actualitad dals 11.01.2023. Maletg: RTR
laschar ir. Durada: 2 minutas 9 Secundas.
cuntegn

Spleia Tambo avra puspè Mitschà cun in egl blau

Il territori da skis da Spleia avra puspè las pistas. Cun las notgs fraidas saja er vegnì fatg naiv uschia ch'ina part dal territori po vegnir avert questa sonda.

Cun in egl blau sajan las pendicularas da Spleia Tambo mitschadas las duas emnas passadas, di il directur Hacher Bernet envers RTR. Finanzialmain fetschi bain mal ch'il territori saja stà serrà l'emprim'emna da l'onn – in emna da vacanzas. Ma l'emna ussa saja uschè u uschia betg ina ferma da la stagiun, uschia che quella sperdita saja minima. La speranza saja dentant anc adina ch'i vegni a naiver, oravant tut il favrer cura che las vacanzas da sport èn ed il temp ideal per ir cun skis.

Naiv e sulegl

La formula da success saja simpla, resumescha Bernet. Avunda naiv e sulegl cura che la glieud ha vacanzas. Uschia è il directur optimistic che la stagiun 22/23 sa tuttina anc vegnir cudeschada sco cuntantaivla. Quai dependia dentant da l'aura e saja lura d'acceptar.

Tgi che vul ir cun skis a Spleia po puspè far quai a partir da sonda, ils 14 da schaner. Las pendicularas da Spleia pon puspè avrir ina part da lur territori da skis. Era sch'i n'ha anc betg dà ina massa naiv, sajan las temperaturas almain puspè avunda bassas per far naiv artifiziala, scrivan las pendicularas vinavant. L'entir territori na po dentant anc betg vegnir avert.

Il di da Bumaun avevan ellas communitgà ch’ellas ston serrar l’entir territori da skis pervi da la naiv che manca.

RTR actualitad 17:00

Artitgels legids il pli savens

Scrollar a sanestra Scrollar a dretga