Far pista na saja betg pussaivel, damai che las pistas cuntegnian memia bler aua e la naiv na schelia betg pli la notg. En consequenza resta il territori da skis da Spleia serrà ad interim.
Il manader da fatschenta da las pendicularas Spleia Tambo Hacher Bernet di in di suenter la decisiun da serrar: «Per il territori da skis èsi fitg serius a nus mancan las entradas. En il Tessin èsi anc vacanzas in'emna e las pistas èn ruinadas. Da preparar da nov las pistas cura che las temperaturas sa sbassan vegn era char.» El guarda adina puspè sin las prognosas da l’aura, dentant na guardia betg ora allegraivel per las proximas duas emnas.
Jau sper ch'i naiva las proximas emnas e ch'i vegn pli fraid. Uschia che nus pudain avrir puspè ils 14 schaner, sche nus avain fortuna.
Restituir bigliets
Actualmain sajan els vi da restituir bigliets, cunzunt cartas da plirs dis ch'ils giasts avevan anc. Per tgi che haja ina carta da stagiun na dettia quai nagina restituziun, cunquai ch'els quintian da pudair cuntinuar la stagiun. Tge che capita cun il persunal stoppia anc vegnir sclerì, uschia Bernet vinavant.
