Val Tgietschen
Il project d'engrondiment per il rempar da la Val Tgietschen prevesa d'amplifitgar il volumen da retegn dal collectur da glera existent sin 7’000 fin 9’000 meters cubics. Quai scriva il chantun en ina communicaziun. Ultra da quai duai il letg da l'aual sut il collectur vegnir engrondì sin ina lunghezza da circa 130 meters. Ils custs totals da quest project èn budgetads cun 2,6 milliuns francs. Tenor la cunvegna da program da la NGF (nova gulivaziun da finanzas) surpiglian il chantun e la Confederaziun cun maximalmain 1,43 milliuns francs.
Val Runcalatsch
Per il rempar da la Val Runcalatsch vegn auzada la via da guaud dasper l'aual, uschia ch'ella furma in rempar che maina davent aua e material en cas d'inundaziuns. Ultra da quai vegn il lieu da distatga serrà cun in rempar da terra, per evitar la distatga da bovas sur il collectur da glera existent. Dals custs totals da var 2,02 milliuns francs surpiglian il chantun e la Confederaziun maximalmain var 1,11 milliuns francs. Il chantun sa participescha supplementarmain cun ina contribuziun per la construcziun da vias da 909’000 francs.
Gia dapi 100 onns indrizs da protecziun
En la Val Tgietschen ed en la Val Runcalatsch datti auals activs che pon chaschunar bovas. Ils dus auals naschan al Piz Linard e s'avischinan la finala al territori dal vitg da Lantsch. Per proteger ils abitadis ed ils stabiliments d'infrastructura han ins cumenzà gia avant passa 100 onns a construir sistematicamain rempars sin ils trajects respectivs. Dapi lura èn ils dus sistems da rempars vegnids engrondids e renovads periodicamain. In'analisa da las ristgas actualas ha mussà ch'igl exista in deficit da segirezza, e quai malgrà ils rempars existents. Per quest motiv ha la vischnanca da Lantsch decidì da realisar quests dus projects.
