Siglir tar il cuntegn

Header

Era en Tumleastga datti blers adversaris da la nova tecnologia da 5G.
Legenda: Era en Tumleastga datti blers adversaris da la nova tecnologia da 5G. RTR, Federico Belotti
cuntegn

Petiziun cunter 5G 544 persunas en Tumleastga fan resistenza

Tar la vischnanca Tumleastga è vegnida inoltrada ina petiziun, che pretenda tranter auter, che la vischnanca na lubescha naginas antennas pli cun la nova tecnologia da 5G.

Sco quai che la vischnanca Tumleastga ha confermà envers RTR, hajan ils petiziunaris tenor atgnas indicaziuns inoltrà 544 suttascripziuns. 376 da quellas persunas vivian en vischnanca.

Tenor la constituziun da la vischnanca Tumleastga ha la vischnanca trais mais peda, da prender posiziun. Activamain agir na sto la vischnanca dentant betg. Il president communal Werner Natter ha ditg, che la petiziun vegnia discutada en suprastanza. Il mument saja dentant memia baud per dir insatge en chaussa.

Ils puncts menziunads en la petiziun

  1. Per l’entir territori en vischnanca na pon betg vegnir lubidas dumondas da bajegiar cun la tecnologia da 5G.
  2. Antennas existentas na pon betg vegnir optimadas sin la tecnologia da 5G, er lubientschas da bagatella na pon betg vegnir dadas.
  3. Ils abitants da la vischnanca Tumleastga vegnan infurmads activ sur da mesiras decididas e mesiras planisadas en connex cun radiaziun d’auta frequenza, surtut sch’i va per 5G.
  4. Lingias d’internet cun cabel (sche pussaivel cun fibra da vaider) duain vegnir examinadas e realisadas, e quai enfin en mintga chasada. In provediment d’internet sur func è d'evitar da princip.

RTR novitads 12:00

Artitgels legids il pli savens

Ir a sanester Ir a dretg