Scolaras e scolars da l'idiom surmiran en l'emprim e segund stgalim pon uss emprender tenor il Plan d'instrucziun 21 dal Grischun. Per ils stgalims suandants n'èn ils meds anc betg pronts. Quels «duain cumparair dad onn da scola ad onn da scola», scriva l'Uffizi per la scola populara ed il sport.
Supplementarmain è da nov era disponibla ina grammatica da scola dal Surmiran. Ils meds èn cun quai pronts per il cumenzament da l'onn da scola 2022/2023.
Ils novs meds d'instrucziun èn vegnids elavurads da la Scol'auta da pedagogia dal Grischun. Per ils idioms sursilvan, sutsilvan, puter e vallader èn ils meds d'instrucziun gia disponibels per scolaras e scolars. Ils cudeschs da lavur stettian a disposiziun tant en furma stampada, sco er en furma digitala sco e-books. I cumparan cudeschs da scola sco era commentaris per scolastas e scolasts.
Meds d'instrucziun accordads cun il Plan d'instrucziun 21
Il Plan d'instrucziun 21 dal Grischun è vegni introducì a partir da l'onn 2017 e metta paisa sin mussar cumpetenzas e betg be savida. Scolars duajan savair applitgar la savida (e betg mo sa regurdar vid quella) suenter la fin da lur scolaziun. L'uffizi scriva era ch'ils meds resguardan las atgnadads regiunalas e culturalas e tematiseschan dumondas actualas dal mund.
