Plazza da sport a Savognin - Plazza custa dapli e vegn realisada cun retard
La plazza da sport La Nars vegn ad esser a fin in onn pli tard e vegn a custar dapli. Uschia è vegnì infurmà a l'emprima badigliada. Quant pli chara che la plazza vegn, n'è anc betg cler. La fin d'avust decida la radunanza communala davart in credit supplementar che va a l'urna il settember.
Motivs per il retard da la plazza da sport La Nars
04:05 min, ord Actualitad dals 28.06.2022.
laschar ir. Durada: 4 minutas 5 Secundas.
Plazza da sport La Nars
Avrir la boxSerrar la box
Il project La Nars cumpiglia trais plazzas da tennis per la stad, e per l'enviern ina plazza da glatsch artifizial. Sper las plazzas da sport èn planisadas garderobas, indrizs sanitars, in magasin ed in'ustaria.
La plazza da sport La Nars a Savognin na vegn betg ad esser pronta gia il december 2022. A la radunanza communala da Surses è vegnì infurmà ch'ils impressaris hajan ils cudeschs plains e per part sajan era vegnidas fitg paucas offertas per las lavurs. Uschia ha la suprastanza decidì d'etappar las lavurs e plinavant sto vegnir dumandà in credit supplementar, che va il settember a l'urna. Simon Bergamin, il manader da l'uffizi da construcziun da Surses, ha ditg sin dumonda ch'ils 4,5 milliuns francs budgetads na tanschan betg. Quant pli char ch'il project vegn, ins saja ussa vi da calcular. Il motiv saja la chareschia generala ed en spezial dal material da construcziun.
1 / 5
Legenda:
Plan per la nova plazza da sport.
Vischnanca Surses
2 / 5
Legenda:
Durant l'emprima badigliada, da san: En il chavaterra: Giani Carisch, Luzio AG; Patrick Thurner, IG La Nars; Linda Netzer, svilup project; Simon Bergamin, manader project vischnanca Surses; Romeo Poltera, suprastant uffezi construcziun; Leo Thomann, president communal; Lothar Künzli, manader scola da skis Savognin.
Federico Belotti
3 / 5
Legenda:
Visualisaziun dal project.
Uffer SA.
4 / 5
Legenda:
Visualisaziun dal project.
Uffer SA.
5 / 5
Legenda:
Visualisaziun dal project.
Uffer SA.
Las differentas purschidas avran en pliras etappas
Simon Bergamin ha sincerà ch'il glatsch vegn ad esser pront per il proxim enviern ed er las trais plazzas da tennis vegnan ad esser prontas la primavaira 2023. Planisà saja alura da remplazzar l'ustaria existenta cun il bajetg nov enfin la fin dal 2023. Quai dentant cun la premissa ch'il credit supplementar vegn acceptà dal suveran da Surses. Enfin che las lavurs èn terminadas, vegn lavurà cun provisoris.
Legenda:
Simon Bergamin, manader uffizi da construcziun Surses
RTR, Toni Poltera
