Pacific, modern e tuttina cun in touch nostalgia or dal temp dal stil floreal. Dapi duas emnas ha la «Winterstube Albula» avert sias portas e porscha a giasts ed indigens in nov lieu d'inscunter durant la stagiun auta d'enviern. Responsabels, dal concept visual fin a la gestiun dal bistro, èn ils set giarsuns e giarsunas da l'Hotel Kurhaus. La motivaziun è gronda.
Igl è grondius che nus pudain far bler sez e decider.
Dapi in pèr onns è l'anteriur Hotel Albula gia stà serrà e l'ultim november ha il Kurhaus Bravuogn pudì cumprar la chasa, cun l'idea da pudair porscher stanzas per lur persunal. In project per lur giarsuns e giarsunas è gia daditg stà sin la glista dal Kurhaus.
-
Bild 1 von 3. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
Las localitads da l'anteriur restaurant da l'Hotel Albula èn vegnidas sco predestinadas per ina tala idea, di il directur dal Kurhaus, Christoph Steiner.
Nus avain vulì spendrar il bajetg ed era porscher ina experientscha unica per noss giarsuns e giarsunas.
Ins haja vulì porscher ina experientscha datiers da la realitad. Ch'ils giarsuns stoppian purtar las consequenzas, sch'els hajan emblidà insatge. Era saja dumandada creativitad ed improvisaziun.
Manar in bistro è bler dapli che mo servir in cafè u in toc turta. Planisaziun da l'emna, contabilitad, marketing. In ad in emprendan els, tge che quai vul insumma dir: gestiunar e promover in agen affar. E tge che quai vul dir da lavurar en in team.
Parter la responsabladad e sustegnair in l'auter ha collià nus anc pli fitg.
Ils simpels tratgs che vegnan servids en il bistro vegnan preparads en la cuschina dal Kurhaus. Mintgin e mintgina po contribuir sia savida dal giarsunadi, els ston però era surpigliar incumbensas che èn in pau ordvart lur zona da confort. Ils cuschiniers han per exempel era ina giada contact cun ils clients en il bistro.
Quai è ina gronda schanza per nus giarsuns. Da trenar chaussas ch'ins n'ha uschiglio betg en il mintgadi da lavur.
Il pop-up pretenda bain dapli lavur per ils giuvens. Els vegnan però accumpagnads intensivamain dals collavuraturs dal Kurhaus, ed els emprendan gia baud da surpigliar responsabladad.
Abilitads che als dessan preparar per l'avegnir, di la responsabla per la furmaziun professiunala, Daniela Florinett. Las giarsunas realiseschian uss che tschertas chaussas na sajan betg uschè simplas e ch'ellas ston emprender quellas – per exempel da ponderar atras ina chaussa enfin a la fin.
Els han gia fatg in grond pass cun l'avertura, uss vegn dentant adina dapli viters.
Ed era sch'els han gì il prim in pau temas e quitads, la motivaziun è stada qua da l'entschatta enavant. Oravant tut la preparaziun saja impurtanta, di Nina Diener, giarsuna en il segund onn.
Ins sto esser qua cun il chau e savair tge ch'è impurtant.
Il pop-up bistro a Bravuogn. In project che promova ils giuvens sin lur viadi en la gastronomia.