La fin d'october è la cuminanza d'interess dals hotels da cultura dal Grischun sa furmada. In dals trais hotels è la Medelina a Curaglia. Il manader da fatschenta da quella, Rico Tuor, vesa ina schanza da promover communablamain la cultura ed il medem mument da profitar in da l'auter cun giasts da vacanzas. La finamira dals iniziants è d'avair tschintg enfin diesch hotels da cultura en differentas regiuns en il Grischun.
-
Bild 1 von 5. L’onn 2026 porscha l’hotel Medelina a Curaglia 18 differents arranschaments da cultura u curs da mastergns tradiziunals. Bildquelle: Hans Huonder.
-
Bild 2 von 5. Il Kurhaus Bravuogn è in manaschi cun gronda tradiziun. Bildquelle: Grischun Cultura.
-
Bild 3 von 5. L’hotel Pontisella a Stampa en Bregaglia represchenta il Grischun talian en il ravugl dals 3 hotels da cultura dal Grischun. Bildquelle: Grischun Cultura.
-
Bild 4 von 5. Ina preschentaziun da Gian Rupf – in da blers arranschaments da cultura ch’il hotel Medelina ha arranschà ils davos onns. Bildquelle: Hotel Medelina.
-
Bild 5 von 5. Curs da mastergns tradiziunals – sco per exempel far scuas – giaudan gronda calamita. Bildquelle: Hotel Medelina.
«La finamira da la cuminanza d'interess dals hotels da cultura en il Grischun è da far pli visibla la purschida culturala e da sviluppar quella, ma era da promover e furmar las valurs regiunalas», di Rico Tuor dal hotel Medelina a Curaglia. El è stà l'iniziant dals hotels da cultura en il Grischun e per quest motiv è la cuminanza d'interess lura era sa furmada la fin d'october a Curaglia.
Sper il hotel Medelina èn il mument dus ulteriurs hotels da la partida: La Kurhaus Bravuogn ed il hotel Pontisella a Stampa en Bregaglia. Sco Rico Tuor di, duai il dumber da hotels che porschan cultura en il chantun Grischun vegnir extendì: «La finamira èn a la fin finala tschintg enfin diesch hotels da cultura en tuttas regiuns linguisticas. Il potenzial exista e l'entschatta cun trais hotels è fatga. Nus essan gia en discurs cun ulteriurs hotels interessads.»
Collavuraziun e barat d'ideas
«I dat hotels da seminari e hotels istorics, ma hotels da cultura na devi anc betg. Entaifer l'Uniun Medelina ch'organisescha arranschaments da cultura, essan nus lura ids a la tschertga da partenaris», di Rico Tuor.
La finamira èn 5 fin 10 hotels da cultura en tut las regiuns linguisticas.
A la fin finala è sa dada la collavuraziun cun l'Uniun Grischun Cultura purtada da l'Institut per la perscrutaziun da la cultura en il Grischun, Grischun Vacanzas, la marca Grischun ed il Post da perscrutaziun da turissem e svilup persistent da la Scola auta per scienzas applitgadas Turitg a Vargistagn.
Destinaziun da cultura
La finamira da Grischun Cultura è da posiziunar il Grischun sco destinaziun dominanta per cultura en las Alps. «Quai è cumbinà cun la promoziun dals hotels participants e cun in svilup persistent era en las regiuns. Persunalmain spetg jau in barat d'ideas tras ils partenaris. Nossa collavuraziun duai dentant er esser ina plivalur per artistas ed artists che pon sut circumstanzas sa preschentar uschia era en auters lieus», di Rico Tuor. Ina da las finamiras dals iniziants da la cuminanza è da s'inscuntrar regularmain trais enfin quatter giadas per onn e discurrer davart ideas e pussaivladads da collavuraziun. In'autra finamira è d'organisar annualmain en l'avegnir ina fin d'emna da cultura alternantamain en in dals hotels da cultura.
Tradiziunal e cultural
Il hotel Medelina a Curaglia en Val Medel è vegnì avert il favrer 2017. El è il giuven en la retscha dals trais hotels ch'èn il mument da la partida en la cuminanza d'interess. Kurhaus Bravuogn ed il hotel Pontisella a Stampa en Bregaglia èn manaschis da gronda tradiziun. Gist quai fa tenor Rico Tuor interessanta la collavuraziun: «Giasts da vacanzas da la Kurhaus Bravuogn u en la Pontisella vulessan forsa era vesair in'autra regiun ed in'autra cultura. Quai è ina schanza per tschels.» Co il barat e la collavuraziun cun artistas ed artists duai sa manifestar, sa mussa gia l'entschatta schaner 2026. Il trio cun la pianista Leila Kramer sa presenta lura en la Medelina a Curaglia e silsuenter a Bravuogn e Pontisella.
Vast program
18 differents arranschaments da cultura e tradiziun offrescha la Medelina l'onn vegnent a ses giasts da vacanzas, ma era als indigens. «Tut las occurrenzas che nus organisain sur l'Uniun Medelina pon sa chapescha era vegnir visitadas u frequentadas dals indigens. Uschia vulain nus era promover la cuminanza», di Rico Tuor. La purschida da l'entschatta schaner enfin la fin december cumpiglia concerts, teaters, prelecziuns ed excursiuns. Ma lura era curs d'artisanat e mastergn tradiziunal. Uschia pon ins emprender da turnar, d'entagliar, far sculpturas da lain u da far scuas cun tortas.
Curs dal mastergn èn tschertgads
«Ils curs dal mastergn èn fitg tschertgads. Per il curs da far chanasters il schaner èn 16 persunas s'annunziadas, la mesadad è indigens. Per che nus hajan plaz avunda per tuts avain nus schizunt stuì affittar stanzas en la chasa da scola a Platta», relata Rico Tuor. In vast program da cultura cun concerts u era luvratoris da scriver ed architectura porscha la Pontisella, u era la Kurhaus Bravuogn cun excursiuns e fins d'emna da cultura.