Interess immens in sonda passada per la liquidaziun da l'inventari da l'Hotel Danilo a Savognin. Quel vegn spazzà e da nov datti abitaziuns, locals per affars ed er in restorant. Quai ha confermà Luzi Thomann, in dals novs possessurs da l'object.
La primavaira 2025 ha Oliver Bühler, il proprietari da l'Hotel Danilo a Savognin, vendì la chasa da tradiziun a Luzi Thomann e Beat Hug. Sco che Luzi Thomann ha testifitgà envers la FMR quintan els il pli tard il schaner 2027 da surpigliar definitivamain quest bain immobigliar. Realitad saja che l'object vegnia demolì e svaneschia uschia or dal maletg dal lieu.
Il nov project duess cumprender abitaziuns, locals per affars, gist nua che il restorant sa chatta ed en il plaun nua che la Banca Chantunala ha ses biros. Quella vegnia lura a pigliar a fit ils locals necessaris, perquai che da preschent saja la Banca Chantunala proprietaria en condomini (Stockwerkeigentümerin) dals locals en il plaunterren da l'edifizi. Las proximas emnas veglian els er gia inoltrar a la vischnanca da Surses la lubientscha per il nov object, ha ditg Luzi Thomann.
En las proximas vegnin nus ad inoltrar a la vischnanca la lubientscha per il nov object.
La finamira dals novs proprietaris è da crear insatge attractiv per il lieu, per il turissem ed in bel edifizi che serva en pliras modas e manieras.
Millis e millis artitgels
Sonda passada è stà l'emprim di che la glieud ha pudì cumprar l'inventari ed il mobigliar da l'Hotel Danilo. Gia in'ura avant che la vendita e la liquidaziun ha cumenzà era avant l'entrada da l'hotel da la vart dal stradun ina colonna lunga. Fatg venal è vegnì l'inventari cumplain, blera rauba, per part bellas chaussas e per part bler crom e rauba da pauca valur. La rauba è da cumprar, cun paucas excepziuns, per in pretsch modest.
Inscuntrà han bleras persunas indigenas, da l'entira Svizra Orientala ed er da Turitg e conturn. Gist cun autos da furniziun e camiuns pli pitschens èn ils cumpraders vegnids a Savognin. Il pli bain è sa vendì il mobigliar da las chombras. Oliver Bühler ha menziunà envers la FMR che blera rauba saja vegnida vendida gia avant la liquidaziun, cun avair fatg venal quella sur ils meds digitals. La hetta Pianta a Radons, in camp per gruppas, e l'ustaria da muntogna Steil'alva, èn vinavant en possess dad Oliver Bühler e vegnan l'enviern proxim er manads dad el.
Suenter 59 onns istorgia
L'Hotel Danilo è prest sis decennis stà in'instituziun, cun excepziun dals davos tschintg onns. Sco er autras chasas ha l'Hotel Danilo gì buns onns, gea schizunt fitg buns onns. Il svilup turistic a Savognin ha cumenzà il 1962 cun vegnir fundada la societad da pendicularas Nandro SA.
Averta è vegnida la sutgera da Savognin a Tigignas e surdà al manaschi èn er vegnids ils runals da Somtgant e dal Piz Martegnas. Cun fluriar il svilup dal turissem han Marc Antona Pianta e sia dunna Dora Pianta, barmiers, construì il 1966 l'Hotel Danilo ed or dal clavà è daventà il restorant Val Verda. In dancing ed er ina bar da chasa han cumplettà quel project. Pli tard è alura er anc vegnida vitiers la Piano Bar.
Ils emprims 19 onns èn directurs stads responsabels per la direcziun da l'hotel, tranter auter er Daniel Bosshard, l'actual mastral da la vischnanca da Silvaplauna. A partir dal 1985 han ils fragliuns Alfonso Pianta, barmier, e Clarita Klee-Pianta surpiglià la direcziun da l'Hotel Danilo. Il 2021 ha l'Hotel Danilo midà possessur. Cumprà quel ha Oliver Bühler, in gastronom ed impressari che stat dapi dus onns en il Tessin. A partir da là è l'hotel ì da mal en mender, cun mancar ils giasts e cun betg esser avant maun la persuna che stat a la testa dal entir manaschi.
Ussa, damai suenter 59 onns, è l'Hotel Danilo istorgia – in'istorgia che sa lascha strusch repeter: Hotel e restorant occupads, las bars cun blers giasts e concerts cun La Compagnia Rossini, ils Fränzlis da Tschlin, la Streichmusik Alder, la band da jazz Walter Weber, concerts da Polo Hofer e Gianna Nannini sco giast regular.