«La parcella ha in potenzial fitg grond», resumescha Luzi Thomann in dals motivs per la cumpra. Ensemen cun Beat Hug – che ha realisà avant in pèr onns il resort da vacanzas Surses Alpin – ha el fundà la societad anonima Salve SA. Quella ha la finamira da realisar projects turistics, ussa pia a Savognin. Sco emprim pass saja d'infurmar l'uniun da commerzi e mastergnanza, ed ils represchentants da la vischnanca e dal turissem, declera Luzi Thomann. Quai succedia gia proximamain.
Letgs chauds, ina chasa da parcar ed in center d'affars
Ina da las ideas dals novs possessurs è da realisar ina chasa da parcar sutterrana, sco era in center cun divers affars e natiralmain emprimas e segundas abitaziuns ed eventualmain er in hotel. L'hotel stuess dentant insatgi auter manar, di Thomann.
Cun la saira d'infurmaziun veglian ins ina giada palpar il puls da las persunas dal commerzi, preschentar pussaivladads e cunzunt era lantschar la discussiun da basa. In giavisch u in'idea da Thomann fiss, che la vischnanca sa participass ad ina chasa da parcar sutterrana da pliras auzadas.
I dovra temp, i dovra ideas ed i dovra in engaschament.
Il pli tard il schaner 2027 va la parcella correspundenta en mauns dals novs possessurs. «Enfin lura vulain nus sclerir ils giavischs ed ils basegns, ed esser avanzads cun la planisaziun», ha Thomann ditg envers RTR. Ch'els investeschan daners en la sanaziun da l'hotel existent saja dentant pauc probabel. Pli interessants sajan la parcella, ed il potenzial da crear insatge attractiv per Savognin sin quella.