L'hotellaria grischuna guarda cun optimissem vers l'entschatta da l'enviern. Ina retschertga da HotellerieSuisse Grischun mussa ch'ils hotels en il chantun èn cudeschads meglier che anc l'enviern passà. Per il president Ernst Wyrsch è quai in signal positiv, sco ch'el di envers il schurnal regiunal da SRF: «Nus avevan gì l'onn passà in bun enviern ed ussa prognostitgain nus anc ina giada 2,9% meglier per questa stagiun d'enviern. Pia, l'atmosfera da basa è allegraivel positiva.»
Dapli giasts svizzers, main da la Germania
Il martgà il pli ferm resta l'indigen, di Ernst Wyrsch. Adina dapli Svizras e Svizzers fetschian vacanzas en il Grischun. Ils Stadis Unids da l'America restian ferms, sin in aut nivel, e lura vegnian era dapli giasts da la Gronda Britannia. Atgnamain attiria il Grischun giasts da tut ils martgads lontans, sco ils stadis dal Golf e da l'Asia, agiunta el. Damain giasts spetgian ins da la Germania, perquai che l'economia na sa sviluppa là per il mument betg uschè bain.
7% da las plazzas pudessan restar vacantas
Sper las malsegirtads dal martgà, occupa era la mancanza da persunal qualifitgà ils manaders e las manadras d'hotels en il Grischun. Prognosas da l'Associaziun da gastronomia mussan, che 7% da las plazzas ch'i duvrass quest enviern, pudessan restar vacantas.
Quai è in vair problem! Sche giasts èn qua e pronts da pajar in aut pretsch, èsi da grond'impurtanza ch'ins haja er avunda collavuraturas e collavuraturs per furnir las prestaziuns spetgadas.
Il mender cas stuess'ins reducir la purschida da tscherts manaschis. Per exempel in'ustaria che na pudess betg esser averta set dis l'emna. «E sche nus stuessan ussa pervia da mancanza da collavuraturs e collavuraturas reducir prestaziuns, pia purschidas, uschia che restaurants na fan betg set dis l'emna svieuta, mabain mo tschintg dis, per dar ina resposta sin quai, na fiss quai betg bun!»
App per far frunt a mancanza da persunal
Per evitar quai e per far frunt a la mancanza da persunal, èn las associaziuns da las pendicularas, dals hotels e da la gastronomia s'unidas ed han sviluppà ensemen ina app. Cun quella duessi esser pli simpel per persunas interessadas da s'annunziar per ina plazza. Sper quai na vulan ins betg mo persvader ils giasts da la qualitad dals hotels, mabain er pussaivel persunal futur. «Nus essan tar bunamain 40% da tut las plattafurmas da valitaziun d'hotels adina davant. Da quai sperainsa che qualitad sa mettia atras. La propaganda da bucca ed ureglia gira cun schlantsch, per ch'ins possia mitigiar quai il meglier pussaivel.»
Persunal ha pli autas spetgas
Ma il persunal, che n'è savens betg dal Grischun, na sto betg mo lavurar, el sto er savair durmir insanua. L'enviern passà aveva quai num ch'i dettia memia paucs alloschis. Quella situaziun saja, almain tar la quantitad, sa mitigiada, di Ernst Wyrsch. «Tar la qualitad èsi fitg difficil, perquai che las spetgas dals lavurants e lavurantas creschan rasant ed ins na po betg adina porscher quai che la lavuranta u il lavurant vuless. Ma nus avain avunda letgs e sutgas, per dir uschia.»
La stagiun d'enviern en il Grischun sa preschenta cun perspectivas maschadadas per l'hotellaria. Malgrà la dumonda stabila, sto la branscha anc adina far frunt a la sfida da la mancanza da persunal qualifitgà.