«Retardaments temporars per elavurar dumondas da bajegiar» – uschia tuna il titel dal messadi dal servetsch da construcziun auta da la citad da Cuira da mez fanadur. La raschun persuenter saja ina mancanza da persunal spezialisà, sco Simon Gredig di. Quel saja – sco er en autras secturs – grev da chattar en la sparta da bajegiar.
I n'è betg simpel da recrutar glieud cun enconuschientschas specificas tecnicas: in pau da gener giuridic, ma er architectonic.
Il manader dal departament da construcziun declera che duas da sis plazzas en il secretariat manchian – quai è in terz. L’entira lavur stoppia uschia vegnir repartida sin mo quatter persunas e quellas lavurian actualmain di e notg per dumagnar la situaziun. Tras quest squitsch possia parzialmain dar retardaments tar respostas u che las lavurs na possian betg gist vegnir fatgas. Tenor Simon Gredig possian tuttina tut ils termins vegnir respectads.
E sia finamira saja clera: Simon Gredig speria da pudair reoccupar las plazzas libras uschè svelt sco pussaivel – per distgargiar las collavuraturas ed ils collavuraturs che lavuran ussa gia en il secretariat e per puspè pudair porscher a la populaziun da Cuira il service regular.
Mia finamira è che nus essan enfin la fin da l'onn puspè uschè lunsch che nus pudain occupar tut las plazzas. E lura, en il decurs da l'onn proxim, pudain speranza puspè esser cumplettamain en il manaschi normal.
Che la mancanza da persunal spezialisà en il departament da construcziun auta saja in problem mo en la citad da Cuira, quai dementescha Simon Gredig. El sappia anc d'autras citads cun las medemas sfidas.
Secretariat daventa inspecturat da construcziun
La midada dal num da secretariat sin inspecturat da construcziun na muntia naginas modificaziuns per la populaziun, sulettamain il num sa midia. Quai n’haja bain nagina influenza sin il dumber dal persunal spezialisà, ma tuttina veglian ins appreziar la lavur da las persunas che lavurian là e che na fetschian betg mo lavurs da secretariat, sco il cusseglier da la citad di. Uschia saja il num inspecturat stà necessari e vegnia implementà a partir dal settember.
Or da l'archiv: