Il pli impurtant curt e cumpact:
- 70 partidas da locataris ston bandunar ina da las chasas autas en il quartier Lacuna a Cuira sin la fin d'avrigl 2026.
- La possessura, la Asga Pensionskasse Genossenschaft, vul sanar totalmain il bajetg.
- La sanaziun saja necessaria perquai che l'infrastructura tecnica na saja betg vegnida renovada dapi la construcziun da la chas'auta il 1966 e perquai ch'ins haja chattà substanzas nuschaivlas.
- Renovar senza bandunar il bajetg na saja pervi da la dimensiun da las lavurs betg pussaivel.
Per la disditga dettia pliras raschuns, sco la possessura da l'immobiglia conferma envers RTR. Sco emprim aveva la gasetta Südostschweiz rapportà en chaussa. La chas'auta saja vegnida construida il 1966. E dapi lura na saja strusch vegnì fatg insatge vi da l'infrastructura tecnica da la chasa, uschia Peter Pickel, manader da la sparta d'immobiglias tar la Asga envers la Südostschweiz. Sco exempels numna el las lingias dal stgaudament u er quellas da l'aua da baiver che sajan en in schlet stan. Perquai haja la cassa da pensiun la finala decis da sanar a l'engronda la chasa.
Sco ulteriura raschun per quella decisiun numna Peter Pickel ch'i dovria er ina sanaziun cumplessiva perquai ch'ins haja chattà substanzas nuschaivlas. Quellas stoppian ins allontanar e dismetter a moda professiunala. Ni pervi da las substanzas nuschaivlas ni pervi da l'infrastructura veglia dettia privels per abitantas ed abitants ma i saja in ristg potenzial.
Betg la regla
La Asga emprovia da princip adina da sche pussaivel sanar ils bajetgs senza che la glieud stoppia bandunar las abitaziuns. En quest cas dettia però lavurs massivas che fetschian ch'i na saja betg pli pussaivel d'abitar vinavant en las abitaziuns durant las lavurs da renovaziun – quai saja dapli che ina sanaziun. Tranter auter dettia novs bogns, novas cuschina ed er novas terrassas. Pervi da quai dettia er per part rusnas en la fatschada uschia ch'i n'haja tranteren betg pli dapertut mirs encunter anora.
Locataris survegnan sustegn
Tenor Peter Pickel vegnia la cassa da pensiun a sustegnair la glieud che stoppia bandunar las abitaziuns. Quai entras in team d'ina firma spezialisada sin l'administraziun d'immobiglias. Las persunas survegnian er precedenza sch'i vegnia liber abitaziuns tar quella firma. Plinavant gidian ins ils locataris e las locatarias activamain tar la tschertga d'ina nova abitaziun, i dettia ina referenza positiva sch'insatgi s'annunzia insanua auter per ina abitaziun sco er ina hotline ed in'adressa da mail per la communicaziun. Er dastgian locataris e locatarias da la chas'auta dar giu lur abitaziuns mintga mais cun in temp da desditga da 30 dis.
Vuschs or dal quartier
-
Bild 1 von 5. Julia ed Anton Rychener èn in dals perins che sto bandunar lur abitaziun en la Via Asperont 19. La brev cun la disditga saja arrivada il di da lur 61avel di da nozzas. Bildquelle: RTR.
-
Bild 2 von 5. Annemarie Bucher furnescha gentars a persunas pli veglias che na san betg pli cuschinar sez. Tranter auter er a persunas en l'edifizi da la Via Aspermont 19. Ella chapeschia tschertas chaussas ch'ins fetschia quai, ma ella chattia tuttina tragic per las persunas. Surtut pervia da la situaziun dal martgà d'abitaziuns actual a Cuira. Bildquelle: RTR.
-
Bild 3 von 5. Nathalie Lento che stat en il quartier pensa ch'i na saja segir betg simpel il mument per quellas persunas. Gist er sch'i vegn tschertgà abitaziuns favuraivlas, tge ch'è fitg problematic il mument. Bildquelle: RTR.
-
Bild 4 von 5. Il dachasa d'Edith Ragaz e la Via Aspermont 19 separa in prà. Ella vesia adina vi l'edifizi ed haja dà in sigl cura ch'ella ha legì dal destin dals vischins e vischinas en la gasetta. Bildquelle: RTR.
-
Bild 5 von 5. Anita ed Amedeo Ludica na vivan betg sez en il quartier Lacuna. Suenter avair udì la novitad sentan els cun las abitantas ed ils abitants da la Via Aspermont 19. Bildquelle: RTR.
I va er per la responsabladad
Per la cassa da pensiun na saja la decisiun da desdir als abitants e las abitantas betg simplamain la pli simpla via. I giaja er per la responsabladad sco possessura dal bajetg. Els na possian betg spetgar giu fin ch'i dettia donns e capitia insatge, uschia Peter Pickel. La cassa da pensiun stoppia agir ad uras per garantir a locataris e locatarias la segirtad e la qualitad d'abitar. E desister da la sanaziun na possian els betg.