Bajegiar ordaifer las zonas da construcziun vegn reglamentadà meglier en l'avegnir. Il Cussegl dals chantuns ed il Cussegl naziunal èn s'accordads ad ina cuntraproposta indirecta a l'iniziativa dal pievel «Cunter la betunaziun da nossa cuntrada». Il parlament a Berna regla da nov il bajegiar ordaifer las zonas da construcziun e franca ina mira da stabilisaziun per bajetgs ordaifer da territoris da construcziun.
Uschia duess ins en avegnir pudair construir edifizis che servan a l'economia indigena er ordvart la zona da construcziun. Il cusseglier federal responsabel, Albert Rösti, va da quai anora ch'i sajan cunzunt las regiuns da muntogna che profiteschian da la nova regulaziun per projects turistics.
Tuttina vegn cun la revisiun da la lescha differenzià meglier tranter zona da construcziun e zona che na po betg vegnir surbajegiada. Uschia vulan ins era far frunt a l'iniziativa per la cuntrada che vul definir quai en la constituziun. Cun la revisiun da la planisaziun dal territori vegnan ils chantuns era supplitgads da definir en il plan directiv co ch'els vulan tegnair stabil la cifra d'edifizis ordvart la zona da construcziun. Vinavant pon ils chantuns definir zonas en las qualas i duess esser pussaivel da transfurmar edifizis agriculs en edifizis d'abitar.
