Tut las affitadras ed ils affitaders da las 70 abitaziuns en la Via Aspermont 19 a Cuira ston bainbaud tschertgar in nov dachasa. Il sgrattatschiel en il quartier verd vegn renovà cumplettamain ord dus motivs principals: Per l'ina na saja l'infrastructura tecnica betg vegnida renovada dapi la construcziun dal bajetg l'onn 1966. Latiers hajan ins chattà substanzas da bajegiar nuschaivlas. Uschia na possia la renovaziun betg vegnir fatga durant ch'ils locataris abitian anc en lur appartaments – il risico saja memia grond.
Era Domenig Immobilien ha chasas autas en quest quartier ch'èn vegnidas construidas pli u main il medem temp. Er en questas haja dà talas substanzas sco asbests, di il president administrativ da la fatschenta, Thomas Domenig senior. En congual cun il sgrattatschiel pertutgà suondian els in auter princip: Sche locataris viseschan l'appartament suenter plirs onns, vegnia quel gist renovà avant ch'ils novs affitaders u las novas affitadras possian prender a fit l'abitaziun.
Nus avain adina renovà las abitaziuns successivamain. Sch'insatgi ha disditg in'avdanza, avain nus gist renovà quella: novs bogns, novas cuschinas – tut quai che fascheva basegn. Uschia n'è ina renovaziun totala betg necessaria tar noss bajetgs.
Tras las renovaziuns parzialas n'hajan ins betg mo pudì revalitar il stadi da las abitaziuns, mabain era pudì eliminar bunamain dal tuttafatg las substanzas nuschaivlas u almain pudì reducir ellas sin in minimum pussaivel.
Tenor Thomas Domenig senior saja grev da dir co ins pudess actualmain schliar meglier la situaziun cun las abitantas ed ils abitants da la chas'auta en pitgiras. Ma el è da l'opiniun ch'ins avessi en mintga cas pudì e stuì far inqual renovaziun gia pli baud.
En quest cas è forsa simplamain il sbagl ch'ins ha fatg dapi onns memia pauc. Ed ussa vegn tut en ina giada.
Nua chattan tut las persunas pertutgadas in nov dachasa?
Quai è anc adina la gronda dumonda e quella n'è betg simpla da respunder en la situaziun actuala da mancanza d'abitaziuns a Cuira. En quest punct crititgescha l'architect da 91 onns il departament da construcziun da la citad. El manegia che la birocrazia frainia projects da bajegiar che fissan pli che necessaris. El sez construiss gugent anc dapli sgrattatschiels e chasas cun abitaziuns per far frunt a quella pitgira, ma i cuzzia tenor el bler memia ditg fin ch'ins survegnia ina lubientscha.