Nagin n’ha savì quai – danor ils onurads sezs. La giuria ha tegnì tschelà fin l’ultim mument. Questa dumengia ha la NZZ am Sonntag finalmain laschà il giat or da satg ed ha publitgà il rating dals megliers hotels svizzers. Il rating ha concepì quest onn il Grischun Andrin Willi. Il pèrin Julia e Kurt Baumgartner va cun la plima ed èn ils hoteliers da l'onn 2025. Els han bajegià si la gruppa da hotels Belvedere a Scuol. La FMR ha intervistà Kurt Baumgartner curt suenter ch’il rating è cumparì.
FMR: Avais Vus gia survegnì ina massa gratulaziuns e telefonats oz a bun’ura?
Kurt Baumgartner: Gea, tuttenina hai jau survegnì tants messadis da WhatsApp. Jau sun stà in zichel irrità ed hai telefonà a mia dunna. Ella m’ha ditg: «Kurt, igl è vegnì ora oz, igl è en gasetta.»
Tgi ha gratulà sco emprim?
Ils emprims èn stads giasts che vegnan dapi onns tar nus. Quai ma legra fitg.
Cura avais Vus intervegnì che Vus e Vossa dunna daventais hoteliers dal 2025?
Andrin Willi che timunescha la giuria m’aveva contactà e ditg che nus essan nominads. Dacurt m’ha el infurmà che la giuria ans ha tschernì. Nus n’avain sa chapescha dastgà tradir nagut. I m’ha legrà enorm che la giuria ha tschernì in hotel che vegn manà dals proprietaris sezs.
Glindesdi datti en l’Hotel Dolder a Turitg ina gronda festa nua che Vus e Vossa dunna ed ils auters premiads vegnan onurads. Essas Vus in zichel agità?
Jau m’allegr simplamain – era ch’ina part da la famiglia vegn cun nus. Nus avain sa chapescha in nunditg bun team cun in bun manader ed ina buna scheffa da persunal che lavura dapi ventg onns tar nus. Il premi tutga a l’entir team da radund 160 collavuraturs e collavuraturas.
Il pèrin Kurt e Julia Baumgartner survegn ensemen la distincziun. Tge rolla gioga mintgin da Vus dus en la gruppa Belvedere cun trais hotels a Scuol?
Jau schess ch’jau sun il minister per l’extern e mia dunna la ministra per l’intern. Questa fin d’emna hai jau visità noss pli fidaivel giast a Minca che ha festivà ses 80avel. Cura ch’jau hai telefonà la sonda saira a las otg a chasa, era mia dunna anc adina en biro, malgrà ch’igl è stagiun morta. Quai mussa – jau m’occup dals giasts, ella lavura en biro.
Vossa dunna ha lavurà la sonda saira en biro, malgrà ch’ils hotels èn serrads?
Mia dunna ha ditg ch’ella veglia avant Tschuncaisma anc savair tge novas reservaziuns ch’èn vegnidas fatgas per lura instruir il team. Mintgatant ma dumondan giasts: «Lavura Vossa dunna atgnamain era en il manaschi?» Lura di jau, ch’ella lavuria almain tant sco jau. A medem temp s’occupa ella anc da noss quatter uffants tranter 16 e 24 onns.
Quant impurtant èsi che Vus manais il Belvedere sco pèr?
Jau sun cuntent d’avair ina dunna che ma sustegna tschient pertschient. L’entschatta èsi stà difficil, nus avain gì in grond squitsch finanzial ed era difficultads dad ans cunfinar. Ma ussa suenter 25 onns ha mintgin chattà ses champ.
Tge èsi manegià cun «difficultads da sa cunfinar»?
L’entschatta cura ch’ins surpiglia in hotel sa dispit’ins pertutgant investiziuns. In vul sumbrivals cotschens, in vul sumbrivals mellens. In vul tarpuns, l’auter parchet. En il fratemp fa mia dunna l’interiur ensemen cun ils architects, las reservaziuns ed il marketing. Jau m’occup da las finanzas, da novs edifizis e dals giasts.
Tge cussegliassas Vus ad in giuven pèrin che surpiglia in hotel?
Il principal è ch’ins ha plaschair dals giasts, ins sto avair gugent la glieud. Il cumenzament han ins segir in dir temp, ma la branscha porscha tants buns muments. Suenter l’emprendissadi u la scola d’hotellaria van ins l’emprim atras las stretgas. I dovra lavur constanta, plaschair e la voluntad da tegnair la dira, lura s’avran las portas automaticamain.
Dapi che Vus avais cumprà l’Hotel Belvedere ha Vossa famiglia investì 120 milliuns francs. Tge investiziuns suondan sco proxim?
Nus avain pudì cumprar l’anteriur Coop a Scuol. Là construin nus 20 abitaziuns da vacanzas, ina nova ustaria cun cuschina porscha products locals. I dat ina butia da sport, in indriz da bowling, ina cantina per collavuraturs e purschidas per uffants.
Quant impurtanta è l’Engiadina per Vus?
L’Engiadina è ina cuntrada da bellezza, in da sis en il lotto. L’Engiadina Bassa è optimala, nus pudain porscher trais stagiuns, bunamain quatter. Nus avain in territori da skis cun garanzia da naiv. Ins senta era l’influenza dal sid.
Èsi stà casualitad che Vus essas sa tschentads avant 26 onns a Scuol?
Nus avain manà in hotel ad Arosa. La Banca chantunala ha fatg attent ch’i dess in object a Scuol. Nus essan immediat stads intgantads. Blers n’han vis nagin futur per l’Hotel Belvedere. Nus avain vis nossa schanza – ina buna substanza d’edifizi, ina buna grondezza, situada bain amez la vischnanca. E sco ch’igl è en la vita, hai era duvrà in pau fortuna.