Criticher d'hotel Andrin Willi - «In hotel ha da raquintar istorgias»

Dus nums sisum il cudesch sco auturs – ina surdada

Andrin Willi è creschì si en l'hotel a Mulegns e fa ussa diversas reportaschas da culinarica e gastronomia. El ha surprendì la lavur da Karl Wild, perquai stat per l’emprima giada era ses num sisum il guid «Ils 150 megliers hotels da la Svizra». Tenor Andrin Willi saja quai stà in onn plain emoziuns. Karl Wild guarda enavos sin ina surdada grategiada. Fin la fin haja il schurnalist ed autur dal Grischun gì il sentiment ch’el ha ina lavur da siemi. Uss saja el «be» giast – tuttina dettian intginas chaussas en ils hotels, mo questas na sto el betg pli valitar.

Lavur dals schurnalists

Otg persunas lavuran en la redacziun dal guid «Ils 150 megliers hotels da la Svizra». Els derivan tuts da diversas professiuns. Tranter auter èn els hoteliers, lavuran en il turissem, èn schurnalists ed en general fans ed amants d'hotels. Els elegian ils hotels – sche pussaivel – mintg’onn in zic auter. Lura s'annunzian els tar ils hotels e vegnan lura envidads da vegnir a testar quels. Ina part dals puncts totals derriva da la valitaziun dals testaders – 35 da 100 puncts fan dentant las opiniuns dals giasts, ed era las stailas che l'hotel ha, ora.

Ils hotels as pudessan preparar sin questa visita perquai ch’ils testaders èn annunziads. Ins na possia dentant betg meglierar in hotel en curt mument. En il cudesch èn valitads hotels da trais enfin tschintg stailas ed anc categorias pli specificas, questas èn novas. Atras quai è ina midada da Karl Wild sin Andrin Willi, ch’il cudesch ha num «Ils 150 megliers hotels da la Svizra», e betg pli «Ils 125 megliers hotels da la Svizra».

«In hotel ha da raquintar istorgias»

I fa quaidas, sche Andrin Willi raquinta da las crêpes da sia tatta. E sch’ins legia co ch’el descriva in «soufflé marbré» cun tschigulatta «grand cru» e vaniglia da Madagascar, viagiass ins il pli gugent immediat a Genevra en il restaurant che serva la delicatessa. Il schurnalist, ch’è creschì si en l’Hotel Liun a Mulegns, chapescha da raschunar dals daletgs gastronomics e d'entusiasmar.

Ils 26 da matg cumpara il guid «Die 150 besten Hotels der Schweiz 2025/26» dad Andrin Willi. Sch’el descriva ils hotels uschè bain sco las crêpes da sia tatta, daventa il guid segir e franc in success. En discurs cun FMR raquinta el da ses mintgadi variant ed extraordinari sco criticher d'hotels.

FMR: Vus avais il pli bel job dal mund – u betg?

Andrin Willi: En mintga cas! Jau hai plirs jobs. Il job da testar hotels è il pli bel dal mund. Jau scriv gea gia dapi 25 onns da la gastronomia e poss mangiar en buns restaurants. Ma jau ditg adina: Ins na po betg be mangiar e baiver, ins sto mintgatant era durmir.

Durmis Vus mintg’autra notg en in hotel da luxus?

Per cletg na datti gea betg be hotels da luxus. Nus preschentain en noss cudesch 150 hotels da tut las categorias. Ussa vom jau gist a Losanna en in hotel da tschintg stailas. Jau sun en media ina giada l’emna en in hotel.

Metta l'hotelier u la hoteliera ora il tarpun cotschen, sche Andrin Willi vegn? U visita in criticher d’hotels «undercover» in hotel?

Igl è sco en il schurnalissem da viadi. Ins fa giu in termin, la glieud sa ch’ins vegn, la chaussa è clera. Per il solit èn ins envidà da star sur notg. Auter na fissi gnanc pussaivel da far schurnalissem da viadis. Tar nus èsi il medem. Nus na pudessan betg descriver uschè bain ils hotels, sche nus n’avessan betg l’opportunitad da pernottar en ils hotels.

Sche Vus tschertgais in hotel per far in viadi privat, pia betg sco schurnalist, sin tge guardais Vus lura?

Ils proxims dis vom jau a Barcelona en in hotel ch’jau enconusch gia. Pertge? Jau sun simplamain cuntent ch’i dat in pitschen pool ch’jau poss nudar. I dat ina bar nua ch’ins dastga fimar. Jau hai gugent cigaras. In hotel cun fumoir hai jau perquai fitg gugent. Era restaurants èn mia passiun – la cuschina, mangiar, vins. Perquai tschern jau savens hotels cun in restaurant interessant ubain cun ina bella terrassa.

Essas Vus in zichel gnervus? Ils 26 da matg cumpara Voss guid cun 150 ­hotels svizzers.

Gea, per esser sincer bain. Fin uss ha Karl Wild – ch'ha inventà quest rating avant 28 onns – fatg il guid. Jau al fatsch per l’emprima giada. A la vernissascha vegnan 200 persunas dal mund da l’hotellaria. Uschia sun jau natiralmain in pau agità. Jau hai era midà tschertas chaussas dal rating. Quai vegn segir a dar bler da discutar. Intgins vegnan ad esser d’accord, auters n’èn forsa betg perencletg.

Il rating cumpara gia in di avant la vernissascha en la NZZ da la dumengia. Co reageschan ils hoteliers che van cun la plima?

Ils hoteliers e las hotelieras che gudognan vegnan segir a la vernissascha en l'Hotel Dolder a Turitg. I dat er intginas persunalitads ch’èn gia infurmadas ch’ellas gudognan, per exempel il cuschinier da l’onn u l’hotelier da l’onn. Per auters è il rating ina surpraisa. Jau sper ch’els sa legran.

Vus survegnis probabel blers matgs fluras e bunas buttiglias vin da las persunas che sa legran. Ma co reageschan ils hoteliers che crodan or dal rating?

Tgi che vul esser bainvis tar tuts, na dastga betg scriver in tal rating. Ils ins reageschan a moda professiunala e vulan savair, tge che n’era betg bun. Nus empruvain da declerar avertamain nossa decisiun. I dat er hotels pli pitschens che mussan la trumpada. Ils ins han plaschair dal rating. Ils auters, che na van betg d’accord, dian ch’ins n’haja nagina idea. Cun quai ston ins pudair viver.

Fin l’onn passà è il rating cumparì mintgamai en la SonntagsZeitung. Quest onn vegn el publitgà en la NZZ am Sonntag. Vul ins cuntanscher clientella pli bainstanta?

Na, quai ha gì raschuns editorialas.

Quant custi da pernottar en in hotel dal guid?

Nus avain en la categoria da hotels da vacanzas «nice-price» hotels da trais stailas e nus avain hotels da quatter u tschintg stailas. Cun ils pretschs dinamics d'oz èsi grev da numnar pretschs. Gist durant l’ESC è er ina notg en in hotel da trais stailas a Basilea fitg chara.

Ma Vus pudais segir inditgar pretschs.

I cumenza tar 150 francs. Ensi na datti strusch cunfins. Jau sun gist stà a guardar ina chombra che custa 39'000 francs. Jau n’hai betg durmì en questa chombra, ma pudì la visitar.

39'000 francs è il pretsch per be ina notg?

Gea. I dat adina dapli talas suitas grondas per famiglias che vulessan star pli ditg. Glieud che prenda ina tala suita na stat betg be ina notg. En quest hotel ch’jau hai visità ha ina famiglia prendì a tschains la suita per in mais.

Pertge duess jau cumprar il nov guid, sch’jau poss gea cumparegliar sin ­booking.com las valitaziuns d’hotels?

Noss rating d’hotels è d'ina vart l’opiniun da nossa redacziun, cumbinada cun ina nota da las stailas d’in hotel ed ina nota dals resultats dals giasts. Tar plattafurmas sco tripadvisor survegnan hotels savens ina nauscha valitaziun, perquai ch’els èn chars. En valitaziuns en l’internet datti «opiniuns da giasts» ch’èn simplamain cumpradas u falsifitgadas. Noss rating d’hotels porscha segirezza ed ha ina buna reputaziun.

Il schurnalist Karl Wild, oriund da Cuira, ha fin ussa scrit il guid. Uss avais Vus surpiglià il timun cun ina nova redacziun. Èsi casualitad che Vus essas omadus Grischuns?

Gea, igl è casualitad, ma ina bella (sto rir). Nus ans enclegiain bain e giain mintgatant a mangiar ensemen. Jau al dumond per cussegl ed el dat gugent scleriment. Ma el na sa maschaida betg en. El è sa retratg dal rating ed ha scrit per il guid be pli la rubrica da truvaglias cun hotels in pau zuppads e spezials.

Vus essas creschì si en l’Hotel Liun a Mulegns. Co è quai stà?

Quai è stà super. Sch’ins crescha si en in hotel ed ins ha gugent carstgauns, lura arriva il mund tar tai. Ti stos be seser en tes restaurantin e la glieud vegn natiers. Nus avain adina gì giasts fitg interessants. Mia onda ha manà l’hotel, mes bab è stà il cuschinier e mia mamma ha gì in affar sco coiffeusa a Beiva. Nus uffants avain gì tut las libertads e nus avain pudì far stuccas cun ils giasts.

Sche Vus pudessas bajegiar in agen hotel, co vesess quel ora?

In hotel che ma plascha fitg bain è la Villa Feltrinelli a Gargnano en l’Italia. Ella tutgava ad in hotelier che aveva fatg raps cun ina chadaina d’hotels e cura ch’el è vegnì pli vegl, ha el ditg: «Ju less anc far ina giada en mia vita in bel hotel.»

Tge è particular vi da quest hotel?

Ti na stos nagut e dastgas far tut – quai è il luxus. Ti pos ir a la bar a maschadar tes agen drink ubain era simplamain empustar il drink. Ti pos empustar in past en il restaurant ubain ir en cuschina a declerar al cuschinier, tge che ti vulessas precis. La villa è situada al Lai da Garda ed è in pau sco in chastè.

Vus na construissas betg in nov hotel?

Na, jau hai gugent chasas veglias. Jau sun creschì si en in ambient vegl ed hai gugent istorgia. In hotel ha da raquintar istorgias.