Ils 7 da november 2025 ha cumenzà la renovaziun da l'hotel Scaletta a S-chanf cun l'emprima palada simbolica. La fundaziun Scaletta S-chanf che persequitescha il project dapi il 2020, vesa en quai in pass impurtant per il mantegniment da l'istorgia e cultura locala. L'hotel, cun origin en il 16avel tschientaner, duai puspè daventar in lieu d'inscunter suenter la renovaziun.
-
Bild 1 von 3. L'emprima palada simbolica. La surdada dals plans entras Herbert Schmid, president da la Fundaziun Scaletta S-chanf, a Mengia Mathis, presidenta da la cumissiun da construcziun. Bildquelle: Fundaziun Scaletta S-chanf.
-
Bild 2 von 3. Visualisaziun da l'hotel planisà. Bildquelle: Fundaziun Scaletta S-chanf.
-
Bild 3 von 3. L'hotel actual. Bildquelle: Fundaziun Scaletta S-chanf.
La renovaziun era stada planisada gia pli baud, aveva dentant stuì vegnir stuschada per motivs finanzials – ils custs pli auts avevan sfurzà la fundaziun da analisar anc ina giada la situaziun.
Autenticitad istorica ed architectura moderna
La renovaziun, che vegn realisada en stretga collavuraziun cun la protecziun da monuments, collia elements istorics, sco decoraziuns da sgrafit, cun architectura moderna. 36 chombras dublas èn planisadas, da las qualas 18 vegnan ad esser accessiblas senza obstachels. La gestiun tras la Cassa da viadi svizra (Reka) vegn a crear radund 20 novas plazzas da lavur, sco la fundaziun scriva.
La Reka surpiglia il manaschi da l'hotel per almain 20 onns. Igl è il terz manaschi che la Reka ha en l'Engiadina, ils ulteriurs dus èn a Scuol ed a Madulain.
Sustegn per in project persistent
Malgrà il cumenzament da la construcziun dovra la fundaziun vinavant sustegn finanzial per segirar ils ultims 5% dal chapital dal project che custa en tut radund 14,5 milliuns francs.