Siglir tar il cuntegn

Header

Navigaziun

Purtret d'ina chaura morta giun plaun.
Legenda: In luf ha probabel stgarpà 12 chauras sin l'alp da Präz. MAD, Uniun purila grischuna
cuntegn

Präz Luf ha probabel mazzà 12 chauras sin territori d'alp

Sco quai che l'Uniun purila grischuna scriva, haja in luf attatgà la notg da mardi sin mesemna ina muntanera da 15 chauras sin il territori d'alp a Präz. Mazzà haja el 12 animals. La muntanera era en ina saiv. Mardi saira haja il pastur responsabel anc controllà la saiv e l'electricitad vid quella. Tut saja stà en urden. Sco usità tar chauras saja la saiv stada 105 cm auta, scriva l'Uniun purila grischuna. Il manader da l'Uffizi da chatscha e pestga Adrian Arquint ha confermà che las morsas sajan il pli probabel d'in luf. In'analisa da DNA ston ins dentant anc spetgar giu.

Chattà las chauras la bun'ura

Mesemna haja il pastur constatà las attatgas sin las chauras ed haja immediat alarmà la surveglianza da chatscha. 10 da las chauras sajan stadas mortas, in'ulteriura hajan ins stuì mazzar, duas eran sparidas e duas han survivì l'attatga. In'ulteriura chaura haja ins chattà pli tard blessada be lev. Las chauras tutgan tuttas al medem possessur. Il survegliader da chatscha ha constatà che la saiv correspundia a la norma.

Sorts da Pro Spezia Rara van puspè a perder

Dasper la situaziun greva emoziunala, pondereschian adina dapli purs en la regiun cun in pèrin da lufs, da betg pli far si animals pitschens u da metter quels sin l'alp. Cun quai vegnia dentant messa en privel la diversitad ecologica sin las alps sco era las bregias ch'ins haja fatg da mantegnair las chauras e nursas da Pro Spezia Rara, ha declerà il pur pertutgà.

RR novitads 15:00