Durant 10 emnas èn ils scolars e las scolaras da la 5avla e 6avla classa da la scola Donat sa fatschentads cun il tema intervistas. Suenter ponderar e tschertgar temas han els mess ensemen dumondas ed alura tschertgà in u plirs partenaris d'intervista.
Ils uffants han sentì spert, ch'i n'è betg uschè simpel da chattar in partenari d'intervista.
Mo cun dumandar pliras persunas e forsa dumandar en in auter vitg avevan la fin finala tuttas set gruppas da dus chattà in u plirs partenaris d'intervista.
La gronda lavur
Las intervistas han ils uffants registrà cun il telefonin. Suenter hani transcrit quellas en in text. I saja per part stà grev da tadlar bain e prender or l'impurtant e da formular ch'i na vegnia er betg lungurus. Anc pli gronda era la sfida sch'ils uffants avevan fatg l’intervista per tudestg. Da translatar en rumantsch haja duvrà bler temp ed er sustegn da las scolastas.
I n'è betg stà uschè simpel da transferir l'intervista a bucca en in text.
«Il punct sin l'i»
Sco highlight dal project èn ils texts dal scolars e las scolaras cumparids en la Quotidiana. Ils scolars sajan mintg’emna sa legrads sin la gasetta. I saja in bel sentiment da vesair il product final stampà en la gasetta. Inqual uffant ha er survegnì resuns da bab u mamma u tat e tatta, tuts hajan ditg ch’els hajan fatg ina buna lavur. Inqual dals 14 uffants savess s'imaginar da puspè ina giada scriver insatge per la gasetta. Tgi sa, forsa è tranter els in u l’auter futur schurnalist u schurnalista rumantscha da la Val Schons.
