Sper la mancanza da persunal qualifitgà che pertutga tut las branschas pudess tenor Nicolas Pernet, il directur dad RTR, la demografia esser in problem. I dettia pli pauca glieud che discurria rumantsch ed ils giuvens e las giuvnas giajan per gronda part en la bassa per lavurar.
Er Nicolo Bass da la Posta Ladina di ch'ins haja gia in temp da cumbatter per chattar schurnalists e schurnalistas rumantschas. Tar la FMR saja il problem plitost punctual: surtut en il Grischun Central saja tut auter che simpel da chattar in schurnalist u ina schurnalista, en il «microcosmos» Sutsilvan saja ina sfida enorma. Er il scriver rumantsch pudess tenor David Truttmann, il schefredactur da la FMR, esser ina barriera.
Stentas
Nicolo Bass da la Posta Ladina di ch'ins saja en contact cun la scola schurnalistica «MAZ» a Lucerna e fetschia era adina puspè acziuns en las scolas da la regiun per recrutar persunal. Schia vul ins svegliar l'interess per il schurnalissem pli baud pussaivel. Er tar la FMR han ins fatg grondas stentas: Ins haja quasi telefonà giu l'entir Grischun Central ed er aposta engaschà insatgi per chattar persunas adattadas dal Grischun Central. Senza success. La pli nova acziun sajan ussa differentas occurrenzas en las regiuns per far «reclama» e svegliar l'interess.
Mai dar si la speranza
David Truttmann, il schefredactur da la FMR ch'è er responsabel dapi da dus onns per la Pagina da Surmeir, è cuntent da la saira d'infurmaziun a Savognin. Spetgà hajan els quatter enfin tschintg persunas, cun esser stadas pli u main set persunas interessadas a la saira e cun avair bunas discussiuns a la fin da la preschentaziun, saja el cuntent. La finamira minimala è da crear in pool da redacturas e redacturs, en cas optimal d'occupar la plazza vacanta cun in pensum fix. Quantas persunas e sch'i gartegia insumma vegn a mussar il futur. David Truttmann en mintga cas è da buna speranza.
Scola da schurnalissem
Il dumber d'absolventas ed absolvents da la scola da schurnalissem «MAZ» a Lucerna saja dapi onns regressiva, quai tenor la directura Martina Fehr. Ella vesia pliras raschuns pussaivlas. Pervia da la concentraziun da medias sajan ina massa plazzas da praticum e voluntariat crudadas davent. Er il squitsch finanzial saja da sentir, uschia possian adina pli paucas redacziuns sa prestar da surpigliar ils custs per la furmaziun da diplom da dus onns a la «MAZ».
Or da l'archiv:
