Siglir tar il cuntegn

Header

video
Regiun Alvra: meglras colliaziuns dal traffic public
Or da Telesguard dals 24.08.2022.
laschar ir. Durada: 3 minutas 12 Secundas.
cuntegn

Regiun Alvra Meglras colliaziuns dal traffic public

Cun la midada da l’urari dal proxim december datti meglras colliaziuns tar il traffic public en Surmeir, quai grazia novs curs cun l’auto da posta. Da nov cursescha mintga mes’ura in auto da posta tranter Lai e Casti e da Tusaun-Casti-Savognin.

Represchentants dal traffic public e la politica.
Legenda: Represchentants dal traffic public e la politica han infurmà a Casti davart las midadas da l'urari. Federico Belotti

La Regiun Alvra ha preschentà en ina conferenza per las medias las midadas centralas:

  • En l’avegnir datti sin las lingias da l’auto da posta da Lai-Casti e da Tusaun-Casti-Savognin in curs che parta mintga mes’ura.
  • Da la Bassa enfin a Savognin datti da nov ina colliaziun mintga 30 minutas. Questa midada è gist per il turissem da gronda impurtanza.
  • Grazia al punct da traffic Casti ed Alvagni profiteschan ils passagiers da las novas colliaziuns traversalas cun in pli curt temp da midar auto da posta.
  • La colliaziun Cuira-Tavau è da nov mintg’ura e quai senza interrupziun.
audio
Regiun Alvra: Tact da mes'ura
ord Actualitad dals 24.08.2022.
laschar ir. Durada: 3 minutas 4 Secundas.

Ulteriurs meglieraments en il Grischun

L'urari cun la purschida extendida duai vegnir realisà en il chantun cun l'urari 2023. Tenor il program da la regenza grischuna 2021–2024 duai la populaziun vegnir motivada da midar pli savens sin il traffic public sco furma da mobilitad che protegia il clima. La purschida d'urari meglierada duai plinavant augmentar l'attractivitad dal Grischun sco chantun d'abitar, da lavurar e da turissem.

Traffic regiunal

Il chantun ha empustà tar la Viafier retica in nov RegioExpress da Cuira a Tusaun cun tact da mes’ura. La regiun Alvra retschaiva ultra da quai ina nova e meglra purschida da bus. 

Cun il nov concept da bus daventan plinavant pli sveltas las colliaziuns en la regiun turistica Flem/Laax, ed en l'intschess da l'aglomeraziun da la Val dal Rain Grischuna pon ils tacts vegnir concentrads.

Pli e pli electrisà

La primavaira 2023 vegnan remplazzads 11 bus da diesel tras novs bus electrics, quai en la Val dal Rain Grischuna tranter la vischnanca da Bogn Ragaz e la citad da Cuira. Cun quai vegn sa referì al test cun in bus electric a Cuira ed en l'Engiadina, ch'è stà in success. Ils proxims onns èsi previs da metter en funcziun bus electrics er en ulteriuras regiuns.

Optimà colliaziuns ordaifer il chantun

Il chantun po era profitar d'ina meglra purschida d'urari da las Viafiers federalas svizras. Ellas porschan da nov in tact da mes'ura per l'InterCity Turitg – Cuira las fins d'emna. Medemamain las fin d'emnas ed ils firads collian mintgamai dus pèrs da tren dad InterCity la chapitala dal Grischun directamain cun Berna – Losanna – Genevra.

RTR actualitad 17:00

Artitgels legids il pli savens

Scrollar a sanestra Scrollar a dretga