Siglir tar il cuntegn

Header

cuntegn

Savognin Divers recurs cunter sbuvada da chasa istorica

Ina chasa ed in clavà a Savognin duain vegnir sbuvads en la part veglia dal vitg. Spezial vi da quest cas: L’immobiglia è sin la glista d’inventari da la tgira da monuments ch’ha il degn da vegnir protegida. Plinavant ha il pictur Giovanni Segantini picturà la chasa ed il clavà.

Divers cunfinants han fatg recurs cunter il project da construcziun che prevesa da construir ina chasa dubla cun 11 abitaziuns. Tranter auter vegn fatg valair, che la dimensiun da la chasa saja memia gronda, ella na correspundia betg a la lescha da bajegiar da Savognin.

audio
Recurs cunter sbuvada da la chasa istorica
ord Actualitad dals 03.02.2023. Maletg: RTR
laschar ir. Durada: 5 minutas 5 Secundas.

Chasa veglia duess vegnir sbuvada

Sbuvar e construir ina nova chasa vul la firma Devonas da Cunter. Il manader da fatschenta Rolf Gosswiler n’ha per il mument betg vulì prender posiziun en chaussa. N'er la vischnanca da Surses betg, perquai ch’i sa tracta d’in proceder en lavur.

Chasa betg protegida

Ma po ina chasa dal sedeschavel tschientaner ch’è sin la glista da la tgira da monuments grischuna simplamain vegnir sbuvada? Sco quai che Simon Berger, il tgirader da monuments grischun scriva, possia mo la vischnanca respunder questa dumonda. L’immobiglia menziunada sa chattia en la zona dal center dal vitg. Tenor l’artitgel 21 da la lescha da bajegiar stoppia la structura dals abitadis e la moda da construcziun vegnir mantegnida e cumplettada. Edifizis novs stoppian vegnir integrads areguard la posiziun, la proporziun, la furma da tetg sco era areguard la concepziun en l’abitadi existent. Da princip stoppia il maletg dal quartier existent vegnir mantegnì.

Vischnanca decida

Sco quai che Simon Berger scriva, pudess la vischnanca da Surses laschar proteger temporarmain il bajetg da la tgira da monuments, en il rom da la dumonda da bajegiar. Che la chasa ed il clavà sajan vegnids malegiads dal pictur artist Giovanni Segantini, pudessi plinavant esser in indizi, che la chasa pudess esser interessanta per vegnir protegida. Primo perquai che la pictura documenteschia in stadi che possia vegnir cumpareglià cun il stadi actual, e secundo perquai ch’il pictur haja gì in bun egl per situaziuns ed objects attractivs.

RTR actualitad 12:00

Artitgels legids il pli savens