Cun l’entschatta da la stagiun d’enviern 2022/23 segna Martin Luzzi responsabel per la direcziun da l'hotel. L'um da 32 onns è da Lucerna e burgais da Rossa en la Val Calanca. El succeda cunquai a Michael e Marlies Gehrig, sco la fundaziun che ha cumprà il hotel Piz Mitgel a Savognin ha confermà.
Ina carriera classica
Suenter la scola commerziala ha Martin Luzzi lavurà en l'hotel da tschintg stailas «Storchen» a Turitg en differentas posiziuns. Il Lucernais ha er absolvì la scola da hotel «Belvoir» a Turitg e lavurà durant quel temp sco cuschinier en il restaurant «Le Poisson» ed er sco camarier ed a la bar. Il nov directur dal hotel Piz Mitgel è er stà engaschà per la chadaina da hotels «Swiss Quality Hotels» ed ha manà il hotel «HYVE» a Basilea, ina chasa cun 160 letgs.
En il hotel Piz Mitgel vul Martin Luzzi metter accents cun ina buna cuschina ed in service gentil. E tut quai en in ambient empernaivel e liber tenor il motto: nuncumplitgà però cordial. Ils restaurants duain daventar lieus cun ina buna purschida culinarica per indigens e giasts. Ina rolla centrala haja qua il manader dal restaurant Thomas Nussbaumer.
Midada suenter curt temp
Ils gestiunaris dal hotel Piz Mitgel Marlies e Michael Gehring bandunan il hotel suenter mo in onn e mez. Quai ha la fundaziun Hotel Piz Mitgel Surses confermà l'entschatta da november sin dumonda dad RTR. Dals motivs na vegn scrit concretamain nagut. La fasa d'entschatta saja suenter la renovaziun terminada ed uschia er la lavur dals gestiunaris. Michael Gehring ha sin dumonda davart ils motivs renvià a la fundaziun.
Cura che Marlies e Michael Gehring èn vegnids preschentads l'avrigl 2021 sco novs gestiunaris, suenter che la fundaziun ha cumprà l'hotel da Sepp Waldegg Barmier, n'è betg vegnì discurrì d'ina fasa d'entschatta. Perquai fa questa midada da direcziun surstar.
Era in engaschi cultural per la val
La fundaziun Piz Mitgel Val Surses vul s’engaschar per il manaschi, la protecziun ed il mantegniment dal hotel da tradiziun al stradun a Savognin. Plinavant vul la fundaziun s’engaschar per la cultura en il Surses, stat scrit en il Fegl uffizial chantunal.
Or da l'archiv
