«Il pli gugent gia ier», aveva Katja Schmid ditg la stad passada envers la FMR. Alura tschertgava la mainafatschenta da l’Uniun Laibella urgentamain in nov dachasa per la canorta Tgimirola a Savognin. Ina schliaziun immediata n’ha l’Uniun Laibella betg chattà. Perquai sa chatta la canorta anc adina a Savognin en la Veia Naloz sper la Gelgia.
Quai duai dentant sa midar anc quest onn, sco quai che Katja Schmid ha confermà entant envers la FMR: «Nus avain finalmain chattà ina schliaziun. La canorta Tgimirola po surprender las localitads da la scolina en la Villa Aurora a Savognin, apaina che quella fa la midada en la nova chasa da scola Grava.» Sche tut va tenor plan, saja gia questa stad uschè lunsch. Sin il pli tard duai la midada dentant succeder l’atun.
In dachasa transitoric
La Villa Aurora en la Veia Vil na saja dentant era betg prevesida sco dachasa permanent per la canorta Tgimirola, uschia Katja Schmid: «Igl è previs da restar trais onns en quest bajetg e che la vischnanca construeschia entant in nov edifizi per la canorta.» Nua ch’ins vul construir quel, na saja anc betg decidì. Ma i dettia ina duas opziuns. «E sche la nova canorta n’è anc betg construida en trais onns, pudain nus era prolungar nossa dimora en la Villa Aurora», ha la mainafatschenta da l’Uniun Laibella fatg a savair.
L’Uniun Laibella ha pia era chattà a lunga vista ina schliaziun per la canorta Tgimirola. En vista a la partenza da la Veia Naloz saja però actualmain impurtant da realisar ina midada plaschaivla per tuts. «Nus vulain en mintga cas er integrar ils geniturs en quest process, perquai ch’i pertutga en emprima lingia lur uffants», ha Katja Schmid ditg en connex cun la midada.
Ord la zona da privel
Da pudair sa chasar en la Villa Aurora – vul dir en il plaunterren e l’emprima auzada – munta entant era che la canorta Tgimirola po bandunar la zona da privel. En la Veia Naloz gist sper la Gelgia è il privel d’aua numnadamain stimà sco mesaun fin grond. E quai ha consequenzas per la canorta. Pervia da la situaziun da privel n’ha l’Uniun Laibella betg survegnì la lubientscha da construir ina nova plazza da gieus sin l’avantcurt, sco quai che Katja Schmid aveva explitgà l’onn passà. Per las activitads en il liber han las educaturas ed ils educaturs damai mintgamai stuì tschertgar alternativas.
In dals problems principals da la Veia Naloz pon ins pia schliar cun la midada en la Villa Aurora che dispona gia d’ina plazza da gieus. Là ha la canorta dentant era dapli spazi, uschia ch’ins po ademplir meglier ils basegns dals uffants e dal persunal. L’Uniun Laibella cuntanscha pia sia finamira da mantegnair ina canorta en la regiun. Tranter auter era grazia a la vischnanca Surses ch’è la possessura da la Villa Aurora.