La canorta Tgimirola a Savognin che tschertga dapi in temp in nov dachasa – na vegn betg a midar sco planisà en la villa Aurora. Oriundamain era quest bajetg previs sco soluziun transitorica per trais onns. Ils custs per far las adattaziuns necessarias per ademplir las prescripziuns da protecziun cunter incendis e da polizia per in diever temporar da mo trais onns – na stettian en nagina relaziun cun il niz. La vischnanca avess stuì investir var 100'000 francs, di Adrian Ballat, il suprastant responsabel.
Nus avessan stuì investir var 100'000 francs.
Bajetg nunadattà per ina canorta
La Villa Aurora ch'è en il possess da la vischnanca da Surses è memia gronda per in’utilisaziun mo sco canorta. Ella duai vegnir sviluppada autramain en il futur. Il davos vegniva la chasa nizzegiada per la scolina che fa midada l’avust en in nov lieu. Anc avant era la Villa Aurora ina chasa per gruppas.
Pervia dal privel d’aua gronda e pervia da localitads insuffizientas n’è il lieu actual da la canorta dasper la Gelgia e da la via Naloz betg pli adattà. Là n’ha ina nova plazza da giugar betg pudì vegnir realisada pervia da la zona da privel. E gist ina plazza da giugar pretenda l’uffizi dal servetsch social dal Grischun.
Pli gugent Savognin che Salouf
La vischnanca da Surses è conscienta da l’impurtanza da la canorta per l’attractivitad dal lieu e sustegna quella finanzialmain cun ina garanzia da deficit. Ussa vegnan examinadas differentas opziuns, tranter auter er lieus ordaifer Savognin sco per exempel Salouf. Quai na vegn dentant betg considerà sco soluziun ideala, perquai che per blers geniturs che lavuran en la regiun signifitgass quai in viadi pli lung. Er da construir in nov edifizi per la canorta vegn vinavant tratg en consideraziun sco opziun. La vischnanca sa stenta da chattar ina buna soluziun a lunga vista per mantegnair la canorta Tgimirola a Savognin u en il proxim conturn.
