Siglir tar il cuntegn

Header

cuntegn

Savognin Nagin taxi sin la naiv pli

Il taxi cun ina schlieusa a motor en il territori da skis da Savognin na cursescha betg pli. La raschun èn restricziuns da las uras lubidas da charrar. Sco alternativa datti in bus, che transporta da nov era bagascha.

Sco quai che Oliver Bühler, il manader al «Snoxi-Taxi» ha ditg sin dumonda dar RTR, na lubeschian las Pendicularas da Savognin sin basa da la lescha betg pli da charrar tranter las diesch la damaun e las tschintg la saira. Pervi da questa restricziun na fetschia nagin senn pli da manar il taxi da naiv. Far tut ils transports basegnaivels en las uras lubidas na tanschia betg, era na rendia il manaschi uschia betg ha ditg Bühler. Pli baud vegniva tolerà che la schlieusa a motor cursescha era durant il di.

audio
Nagin taxi cun schlitta pli a Radons - l'alternativa è il bus
ord Actualitad dals 01.11.2022.
laschar ir. Durada: 3 minutas 32 Secundas.

Bus prenda era valischs

Sco alternativa datti in bus public che cursescha tranter Savognin e Radons. Quel datti dapi l’enviern 2017/18. Da nov porscha el 16 plazs, avant eran quai tschintg pli pauc. Da nov po era vegnir transportada bagascha, quai n’era avant betg pussaivel. Ina valisch custa 20 francs, medem bler custa in viadi singul per ina persuna creschida. Il manaschi cun il bus ha dentant tscherts dischavantatgs. Sco quai che Marco Jäger, il gestiunari dal bus di, na possia il bus en media betg cursar tranter 15 e 20 dis per enviern, quai pervi da motivs da segirtad, tranter auter datti privel da lavinas.

Marco Jäger è il manader da fatschenta da la firma Taxi Jäger, che maina il taxi da Savognin a Radons.
Legenda: Marco Jäger è il manader da fatschenta da la firma Taxi Jäger, che maina il taxi da Savognin a Radons. Federico Belotti

RTR actualitad 17:00

Artitgels legids il pli savens

Scrollar a sanestra Scrollar a dretga