La Dretgira administrativa dal chantun Grischun ha refusà ina protesta cunter la lubientscha da bajegiar dal project turistic Viols a Savognin. En la protesta da cunfinants gieva quai per l’access al resort da vacanzas e la canera dal traffic. Marcel Friberg, il manader da fatschenta da l’interpresa Resalpina che vul realisar il project, di:
Nus avain natiralmain gì plaschair da quella decisiun perquai che quella dat raschun ed attesta en tuts puncts che noss project è en urden e po ord vista da la Dretgira administrativa vegnir realisà uschia sco el è planisà da nossa vart.
Planisads èn 80 abitaziuns administradas sur il Lai Barnagn, cun ina recepziun, ina zona da welness ed in club per uffants. Investurs sajan interessads d’investir radund 35 milliuns francs en il project, ha ditg Friberg. Anc na po però betg vegnir bajegià, i dat anc in segund cas penal ch’è avert: La fundaziun Helvetia Nostra ha fatg recurs tar il Tribunal federal cunter la publicaziun dal project: La Helvetia Nostra è da l’avis, ch’il project avess stuì vegnir publitgà betg mo en il fegl uffizial regiunal, mabain er en quel dal chantun.
