Trais baselgias datti a Savognin, ma betg ina dad ellas ha ina fatschada picturada da Giovanni Segnatini. L’onn 1889 aveva Segantini fatg ina skizza per picturas vi da la fatschada da la baselgia da Nossadunna. Pertge ch’el n’ha betg fatg la lavur n’è betg enconuschent. I dettia paucas funtaunas e bleras famas, ha ditg Juliane Sauer, la curatura da l’exposiziun Segantini – la skizza en splendur. Ina da las teorias è, che quels da Savognin na vulevan betg pajar la colur per picturar la baselgia.
L’exposiziun cuzza enfin la fin da mars da quest onn. Tranter auter datti a l’exposiziun infurmaziuns da Giovanni Segantini e sias staziuns da la vita. Il 2016 ha in studi dal criticher d’art Beat Stutzer demussà, che la skizza è propi vegnida fatga da Giovanni Segantini.
