Siglir tar il cuntegn

Header

video
Las sfidas da las ustrias a Radons
Or da Telesguard dals 17.01.2023.
laschar ir. Durada: 3 minutas 30 Secundas.
cuntegn

Savognin Ustarias a Radons han patì

Igl è stà in nausch enviern per las ustarias a Radons en il territori da skis da Savognin. Pervi da mancanza da naiv n'èn ils runals per gronda part betg stads en funcziun, quai cun consequenzas gravantas per las ustarias.

Sco quai che l’ustier da la Steil’Alva, Oliver Bühler, ha ditg envers RTR, haja el gì radund 200’000 francs pli pauca svieuta tranter Nadal e Bumaun. Sch’ils runals na curseschian betg, mo paucs che chattian la via a Radons. Ussa spera el ch'i dettia naiv nova e quinta che quest enviern possia anc vegnir spendrà. Per l’ustaria lavuran 15 persunas, quellas èn stadas a chasa sur ils dis da festa. Tar il chantun haja el dumandà per agid en la furma da lavur curta, ha ditg Bühler.

Era il Berghuus patescha

Mal èn ils affars era marschads en il Berghuus a Radons. Sco quai che l’ustier Fadri Arpagaus ha ditg, sajan els tranter 70-80% davos ils affars da l’enviern passà. Atgnamain fissi tut stà pront, ma dals 40 emploiads lavurian il mument be 20, ha Arpagaus ditg. Era el haja dumandà per agid finanzial tar il chantun en furma da lavur curta.

Runals van puspè

A partir dals 18 da schaner duessan ils runals en il territori da skis da Radons – Cartas puspè esser averts. Uschia ch’ina pista collieschia puspè las ustarias a Radons, ha ditg Curdin Baltermia, il directur tecnic da las Pendicularas da Savognin. Sche las temperaturas restian fraidas, lura possia quella pista vegnir mantegnida. Avessi da vegnir pli chaud e betg da naiver, pudessi puspè vegnir stretg cun la pista fin Radons, uschia Baltermia.

RTR Telesguard 17:40

Artitgels legids il pli savens

Scrollar a sanestra Scrollar a dretga