L'entschatta da settember è la senda veglia dal Meir vegnida donnegiada sin ina lunghezza da passa 30 meters. Ussa han represchentants e represchentantas da las vischnancas da Scharans, Vaz, e dal chantun decidì da sanar la senda.
La senda colliescha Scharàns e Muldain, e vegn cunzunt nizzegiada per ir cun velo e per viandar. Suenter la bova ha la vischnanca da Scharàns laschà intercurir geologs e geologas il grip, avant da discutar davart lavurs da reparatura e construcziun.
Differentas mesiras èn pussaivlas da sanar la senda. La pli chara è da construir in tunnel, e la pli simpla da far in uschenumnà «Trampelpfad». Quai vul dir ch'i duess dar ina nova senda sur la senda ch'è vegnida sutterrada cun crappa.
Anc il november vulan geologs far ina visita nova al lieu per pudair decider en detagl. Sche tut va tenor plan, pudessan las lavurs cumenzar gia la primavaira da l'auter onn. Il president communal da Scharans Werner Preisig ha ditg, ch'i fissi bel sch'ins pudess puspè avrir la senda la stad da l'auter onn.
