Siglir tar il cuntegn

Header

cuntegn

Scharàns Via dal Meir curclada vegn liberada dal grip

La Via dal Meir duai puspè esser passabla la stad 2024. Sco la FMR rapporta, ha la vischnanca da Scharàns publitgà ina dumonda da bajegiar. Quella prevesia da tagliar or dal grip ina pitschna senda d'in meter largezza sin ina lunghezza da var 20m. 160'000 francs duai quai custar.

L'entschatta da settember è la senda veglia dal Meir vegnida curclada d'ina bova. Represchentants e represchentantas da las vischnancas da Scharàns, Vaz, e dal chantun avevan decidì da sanar la senda. Pussaivel fiss in tunnel, ina punt u ina liberaziun da la via stada, il tunnel avess tenor la FMR custà 1,5 milliuns francs.

La senda colliescha Scharàns e Muldain, e vegn cunzunt nizzegiada per ir cun velo e per viandar. Suenter che la bova ha la vischnanca da Scharàns laschà intercurir geologs e geologas il grip, avant da discutar davart lavurs da reparatura e construcziun.

Il mars duain las lavurs da rumir e sanar la via sin la vart da Vaz cumenzar. La repartiziun da custs tranter las vischnancas da Vaz e Scharàns ed il chantun vegn anc decidida. La vischnanca da Scharàns spera dentant che 60% dals custs vegnan subvenziunads.

RTR novitads 10:00

Artitgels legids il pli savens