Da nov portan era «il snowli», il mascottin da las scolas da skis svizras, sco era las scolastas ed ils scolasts da skis ina mascra. In souvenir ch’ins enconuscha entant bain dal mintgadi, en cumbinaziun cun ir cun skis dentant insatge nov, cunzunt per ils uffants, di il scolast da skis da la Scola da skis Savognin, Gian Andri Dosch.
In u l’auter uffant dumonda schon «Daco has ti si quai?» u «Jau less era savair sco ti vesas ora». Ma suenter duas minutas èn ils uffants puspè fascinads d’ir cun skis u dad uschiglio insatge.
In’autra mesira che la scola da skis da Savognin ha stuì prender è, stritgar la tgira d’uffants sur mezdi. Uss vegnan ils geniturs per ils uffants, mangian u insatge dal take away u van spert a chasa e portan l’uffant puspè per las lecziuns dal suentermezdi, declera il giuven da Cunter.
Forsa betg il pli simpatic da stuair cuschinar durant las vacanzas, ma quai èn temps spezials. Nus stuain restar flexibels e s’adattar a la situaziun.
Uschia ha era in auter highlight da blers uffants stuì vegnir stritgà: la cursa da skis. Cunzunt per ils uffants ambizius saja quai dir, di Gian Andri Dosch. Percunter èn quels uffants leds che na fan betg uschè gugent la cursa da skis. Malgrà las mesiras e restricziuns, il giuven da 27 onns è leds d’insumma pudair dar scolar da skis.
