Siglir tar il cuntegn
Inhalt

Grischun Central Setgira: Malans spargna aua

En il Grischun datti aua en abundanza, uschia ch'ins gnanc ponderescha cura ch'ins avra la spina d'aua u fa la duscha. Cun la setgira dentant vegn era l'aua pli stgarsa. La vischnanca da Malans ha prendì emprimas mesiras per spargnar.

Spina d' aua cun in pign daguot.
Legenda: Nagut fluescha pli - a Malans èn las fontaunas ord funcziun. Pixabay

Ina mesira saja stada da metter ord funcziun tut las funtaunas. Be entras quella mesira hajan ins pudì spargnar bler aua, declera la presidenta communala da Malans, Susanne Krättli. «Plinavant faschain nus attent la populaziun dad ir enturn conscienzius cun l'aua e da betg sfarlattar ella.» Concret muntia quai per exempel: betg lavar l'auto, betg sauar il curtin u sprizzar giu l'avantchasa. Quant bler ch'ins vegnia da spargnar cun questas duas mesiras, na po la presidenta communala dentant betg dir.

En sasez na fissi betg necessari da spargnar aua, damai che las funtaunas sajan plainas il mument. «Sche nus sentin che l'aua da las funtaunas va enavos, prendain nus en funcziun l'implant da pumpadi per l'aua sutterrana.» Cun auters pleds: ins po pumpar siadora l'aua sutterrana. Cura che precis quai saja necessari, esi dentant daventà disa a Malans d'avertir la populaziun.

Malans è anc l'excepziun

Auter esi en la vischnanca vischinanta a Maiavilla. Malgrà che la situaziun è sumeglianta a quella da Malans, na vegnia il mument anc betg spargnà, ha communitgà la vischnanca sin dumonda da RTR.

Ina situaziun confortabla ha Cuira, damai ch'il livel da l'aua sutterrana saja fitg aut, n'hajan ins insumma mai stuì spargnar, declera il mainafatschenta da l'IBC, Martin Derungs. L'IBC è tranter auter responsabla per il provediment d'aua a Cuira. A Panaduz han ins restrenschì da sauar prads. Uschiglio n'hajan ins prendì naginas mesiras – quai che saja en sasez surprendent, declera Andreas Weber, manader dals manaschis communals da Panaduz e Razén.

Las funtaunas da Panaduz sajan plitost superfizialas. «Quai vul dir ch'ellas reageschan fitg svelt sin fasas sitgas. Cura ch'i haja dà blera naiv, verteschia dentant detg lungas fasas sitgas.» Era a Domat na spargnian ins anc betg.

RR actualitad 12:00