Per Hans Friberg è la «Tgesa Rasteler» ina chasa plain regurdientschas d'uffanza. En quella simpla e pitschna chasa da lain viveva ses aug Tona Candreia, pli enconuschent sco Tona Rasteler ch'era l'ultim rasteler en Val d'Alvra. Hans Friberg ha passentà ses emprims sis onns da vita a Stierva tar ses aug Tona e sia dunna Maria. Durant ils onns da scola e l'emprendissadi a Turitg ha Hans Friberg passentà quasi tut sias vacanzas a Stierva – quest temp e la ruassaivladad sajan stads marcants per el. Ses aug e sia onda sajan stads exempels per ina vita fitg modesta. Forsa saja el pervia da quai suenter blers onns en la Bassa il 2002 puspè turnà a Stierva ed en chasa Rasteler. Hans Friberg ha er pudì cumprar la chasa da ses aug ch'era entant en possess da la vischnanca. Oz viva el cun sia dunna en il bajetg annex.
In sulet giavisch
Per ses anniversari radund da 60, l'avrigl 2014, haja el gì in sulet giavisch di, Hans Friberg: restaurar la «Tgesa Rasteler» en ina moda e maniera che sias regurdientschas d'uffanza hajan anc plaz. Ditg e fatg; durant dus onns han el e sia dunna Hiltrud restaurà la chasetta da lain. Els hajan stgarpà or 11 stresas tarpun dal palantschieu da la stiva, sgrattà davent varsaquantas stresas colur da paraids, plafond e mobiglias fin che la chasetta traglischava puspè. Bleras da las mobiglias èn anc dal temp da Tona Rasteler, sco per exempel ils letgs en l'anteriura chombra da Tona e Maria, ubain ina comoda en stiva sin il plaunterren. Ussa dorman ils uffants e biadis da Hans Friberg en «Tgesa Rasteler» sch'els èn sin visitas, dentant èn er giasts da tut il mund bainvegnids per star sur notg. Ils ultims diesch onns sajan quai stadas passa 2'700 pernottaziuns, di Hans Friberg.
Istorgias da Tona Rasteler
Tgi che visitescha la «Tgesa Rasteler» a Stierva ha il plaschair da pudair tadlar las istorgias da Tona Rasteler e da pli baud che Hans Friberg raquinta: La «Tgesa Rasteler» saja ina chasa da pliras istorgias: La cronica da bajegiar, davent dal 1830 fin oz, l'istorgia da la vita da Tona Candreia e da la mastergnanza sco rasteler, la colliaziun da Hans Friberg cun ses aug e sias istorgias d'uffanza.
Igl ha in'enorma valur sch'ins senta en il pli profund dal cor ch'ins è qua al dretg lieu.
E quest lieu è per el Stierva e la «Tgesa Rasteler», nua ch'el vul passentar il rest da sia vita. Sche l'um da 70 onns fa ina pitschna guida tras la «Tgesa Rasteler» e raquinta da sias regurdientschas e da Tona Rasteler e sia Maria glischan ses egls ed ins senta la ferma colliaziun, uschia ch'el tutga bel entamez il cor.
Sche jau vegn qua mintga bun'ura per dar aria, èn las regurdientschas d'uffanza fitg preschentas.
