Suenter referendum - Surses di stgars Gea a credit per il «Juliertrail»
Il suveran da Surses ha dà glisch verda ad in credit d'impegn da 1,45 milliuns francs per il «Juliertrail», la senda da viandar e mountainbike sur il Güglia, quai dentant stgars cun 51,2%. La fatschenta ha stuì vegnir suttamessa a l'urna perquai ch'il referendum era reussì.
Il «Juliertrail» ha stuì far ina runda supplementara ed ha stuì vegnir avant il pievel. Lez ha uss approvà stgars cun 51,2% il credit d'impegn brut da 1,45 milliuns francs. A l'urna ha il project stuì vegnir perquai ch'igl era reussì a Surses il referendum cunter il credit d’impegn che la radunanza communala aveva approvà il december 2024. Er la vischnanca da Silvaplauna ch'è cumpigliada aveva gia approvà il project.
Avant la votaziun dals 18 da matg
Avrir la boxSerrar la box
En vista da la votaziun ha gì lieu ina saira d’infurmaziun a Bivio, organisada da la partida PLD Surses.
Radund 100 persunas han prendì part. Las opiniuns èn stadas differentas: I ha dà critica, tranter auter pervi dals custs, ed intgins preferissan d’investir ils daners en auters projects.
Er il mantegniment da la via da radund 16,5 kilometers tranter Bivio e Silvaplauna fa quitads ad intgins. Tuttina è ina maioritad s’exprimida positiv envers il project.
Tranter auter è vegnì menziunà ch’i saja da rinforzar il turissem da stad, promover l’hotellaria locala e collavurar meglier cun Silvaplauna grazia a quest project cuminaivel.
Ils custs èn stads in tema
«L’investiziun per il Juliertrail para forsa dad esser in luxus en vista da la situaziun precara finanziala dal Center da Sanadad a Savognin», aveva ditg Stefan Steinerenvers la FMR. Il responsabel per il svilup dal lieu da la vischnanca da Surses ha dentant accentuà ch’ins stoppia quintar cun bler pli pauc che 1,45 milliuns francs custs: «La vischnanca sto approvar il credit brut, pia la summa totala. Ma la fin finala surpigliass il chantun 60 % dals custs imputabels.»
Tenor la stimaziun dals custs stuess la vischnanca pia quintar cun be radund 580'000 francs. Ord vista da Stefan Steiner fissan quels daners investids bain: «Nus vivain dal turissem ed il Juliertrail appartegna ad in plan pli vast da promover quel.» En connex cun l’uschenumnà «Masterplan Bike» ha la vischnanca da Surses numnadamain sviluppà in mussavia per promover la purschida da mountainbike cun in pumptrack e plirs trails.
«Juliertrail» e «Masterplan»
Avrir la boxSerrar la box
Sut la direcziun dad Allegra Tourismus ScRL è vegnì elavurà l’onn 2019 l’uschenumnà «Masterplan Bike» per la vischnanca da Surses. Quest plan serva a la vischnanca sco mussavia per sviluppar sia purschida da mountainbike e promover uschia il turissem en la regiun, sco ch’ins po leger sin la pagina d’internet da Surses. Gia realisads èn entant il pumptrack a Savognin sper il Lai Barnagn ed il trail dal rempar da Marmorera. La primavaira 2025 vegn lura inaugurà il trail da Parnoz ed en planisaziun è ultra dal trail dal Güglia il trail da Somtgant.
Il referendum cunter il credit d’impegn dad 1,45 milliuns francs per il «Juliertrail» pudess pia almain franar in element dal «Masterplan Bike» e quai malgrà che las vischnancas involvidas han omaduas gia ina giada ditg GEA al trail sur il Güglia. La vischnanca da Silvaplauna ha approvà la revisiun parziala da la planisaziun locala per il «Juliertrail» cleramain cun 79 cunter 2 vuschs, sco ch’igl è vegnì documentà areguard la radunanza communala dals 28 da november 2024. Duas emnas pli tard ha lura era la radunanza communala da la vischnanca da Surses ditg GEA. Tenor il protocol dals 9 da december 2024 è la revisiun parziala da la planisaziun d’utilisaziun per il «Juliertrail» vegnida approvada cun 78 cunter 35 vuschs ed il credit d’impegn brut cun 66 cunter 39 vuschs da la radunanza communala.
In trail da muntada svizra
La senda da radund 16,5 km che duai manar da Beiva a Silvaplauna fiss da muntada naziunala, sco ch’il president da la vischnanca da Surses Daniel Wasescha ha explitgà: «Il Juliertrail è d’interess svizzer cun esser ina ruta da bike naziunala. Perquai pudain nus quintar cun il sustegn dal chantun che munta a 60 % dals custs.» Tenor ils plans duain las lavurs dentant cumenzar la stad 2025 ed il trail avrir il 2027.
