Ils puncts dispitaivels èn schliads. A la radunanza communala da la Lumnezia n'ha il percurs da mountainbike Nino Bike Trail betg pli dà da discutar. Il december 2021 cura ch’il credit da 300’000 francs era vegnì concedì aveva surtut la ruta dà discussiuns. La finala è in recurs vegnì inoltrà.
Uss èn pliras adattaziuns vegnidas fatgas per pussibilitar segirtad a tuts, ma era la pussaivladad per l’agricultura da nizzegiar optimalmain ils prads per la pasculaziun, han ils responsabels ditg a la radunanza da vischnanca. Perquai ha il credit supplementar da 120’000 francs era betg dà da discutar ed è vegni approvà senza cuntravusch.
Megliers parcadis per lai da far bogn Davos Munts
En tut han las 69 votantas e votants preschents a la radunanza communala da la vischnanca decidì sur da credits d’ina autezza totala da radund 2,8 milliuns francs. In credit da radund 1 milliun è vegni concedì per la sanaziun dals parcadis, la chanalisaziun, las lingias d’aua e d’electricitad da la via sur il vischinadi da Vattiz fin al lai da far bogn Davos Munts. Ina part dal project è la dischlocaziun dals parcadis sin l’autra vart da la via per evitar da stuair traversar la via per vegnir tar il lai da far bogn.
Sanaziun dal tetg da l’alp Sogn Carli
In project da 750’000 francs è la sanaziun dal tetg da l’alp Sogn Carli sur Morissen. L’alp per vatgas da latg è colliada cun ina lingia da latg fin el vitg. Uss vegn il tetg sanà e il medem mument vegn realisà in implant fotovoltaic. Perquai dovra quai ina nova lingia d’electricitad fin el vischinadi ed uschia vegn era gist la lingia da latg sanada, uschia la suprastanza da la vischnanca Lumnezia. Las fatschentas èn tuttas vegnidas approvadas unanimamain.
Strategia d’energia chantunala ha dà discussiun
In punct da discussiun è la finala stà il plan directiv d’energia chantunal. Quel categorisescha parts da la Lumnezia sco ideal per ovras da vent. En ina votaziun consultativa la fin dal onn 2019 aveva la populaziun dentant ditg NA da in parc da vent. Ma era la situaziun cun la lingia d’aua da Vrin en il lai da Zavraila ha dà da discutar a la radunanza communala. La suprastanza ha sincerà da vulair intervegnir en favur da la lingia d’aua e da tegnair en egl la consultaziun en connex cun il plan directiv chantunal. En connex cun l’ovra solara alpina planisada en Lumnezia ha Daniel Solèr ditg che quest project saja propi pir en la fasa d’examinaziun ed anc betg en planisaziun.
