Siglir tar il cuntegn

Header

cuntegn

Surses Mez milliun per sanar dus hotels

La Nova Fundaziun Origen survegn ina contribuziun da promoziun unica à fonds perdu da max. 263’000 francs per renovar l'hotel Liun als Mulegns. Per sanar l'hotel Danilo a Savognin datti max. 240’000 francs.

La radunanza communala da Surses da glindesdi saira ha approvà las duas fatschentas. Las contribuziuns da promoziun vegnan concedidas tenor las directivas davart la promoziun d'hotels e da manaschis d’alloschament cun letgs administrads da la vischnanca da Surses. L'hotel Danilo a Savognin duess tenor ils possessurs, la cjo SA vegnir renovà. La summa d’investiziun munta a 4,8 milliuns francs, inclus en questa summa è la cumpra da l'hotel ch’è gia succedida. L'hotel Liun als Mulegns duess vegnir sanà per 5,26 milliuns francs, vi da questa renovaziun sa participescha la vischnanca da Surses cun 5%.

Plinavant ha la radunanza communala da Surses

  • Approvà il credit supplementar brut da 450’000 francs per cumprar in’auto-stgala d’occasiun per ils pumpiers da Surses.
  • Concedì a Primin Cotti il dretg da bajegiar per la parcella da dretg da bajegiar nr. 9'959 cun ina surfatscha da 3’527 m2.
  • Approvà la surpigliada da la Societad da mantegniment Salouf cun vigur regressiva sin ils 31 da december 2021, ed annullà sin la medema data ils statuts da la Societad da mantegniment Salouf.
  • Annullà la lescha da l’anteriura vischnanca da Riom-Parsonz davart il mantegniment da las ovras da meglieraziun e da tut las disposiziuns che sa basan sin quella lescha cun vigur regressiva per ils 31 da december 2021.
  • Infurmà davart il stadi da la realisaziun dal Maletg directiv Surses 2030. Uschia è vegnì communitgà, ch'ins haja tranter auter gia realisà ils discurs en diversas fracziuns. Turisticamain saja era marschà bler, uschia saja gia vegnì publitgà il project d'ina nova plazza da sport a La Nars a Savognin, e tar il Lai Barnagn vegnia proximamain avert il nov pumptrack. Pertutgant ina nova chasa da scola a Savognin vegnia il zercladur exponì per il public il resultat da la concurrenza d'architectura. Sin il sectur fatgs socials e sanadad ins haja fundà in cussegl d'uffants, che s'engaschia per ils giavischs dals uffants, hai gì num.

Il cussegl dals uffants e giuvenils en detagl

La vischnanca da Surses sa participescha al project «participaziun d’uffants e giuvenils en las vischnancas Grischunas» da jugend.gr. Cun quel project vul la vischnanca dar ina vusch als uffants e giuvenils da Surses, tge che correspunda er a las finamiras dal maletg directiv Surses 2030 per dapli participaziun da vart da la populaziun. Uffants e giuvenils duessan purtar en, sviluppar e realisar lur idas e giavischs e furmar uschia activ lur avegnir.

Per la realisaziun da la participaziun da giuvenils ha il cussegl da scola dà glisch verda il schaner per fundar ils cussegls da scolars. Naschids è il «cunsegl d’unfants Grava» cun represchentants da classa da la scolina enfin tar la 4. classa primara, sco era il «cunsegl gioven» cun represchentants da la 5avla classa primara enfin tar la terza superiura. Ils cussegls da scolars vegnan accumpagnads da Thomas Eigensatz, assistent da giuvenils.

Construcziun da la chasa da scola primara sco emprim project

Ils cussegls da scolars han gia entschet cun lur lavur. Els han fatg patratgs pertutgond la nova chasa da scola primara. Il video ch’è sa resultà ordlonder vegn ad esser la basa da lavur per ils architects.

Sco ulteriura activitad prioriseschan ils cussegls da scolars projects, ch’els piglian sezs enta maun u ch’els lessan sustegnair. Temas sco disco da scolars, kiosk da scola, però era meglras colliaziuns dal traffic public en las vischnancas u era l’avegnir da la stanza da giuvenils vegnan discutads energicamain.

audio
Leo Thomann davart maletg directiv Surses 2030
aus Actualitad vom 26.04.2022.
abspielen. Laufzeit 4 minutas 4 Sekunden.
Il suprastant da Surses Adrian Ballat
Legenda: Il suprastant da Surses Adrian Ballat ha infurmà davart il stan actual dal Maletg directiv Surses 2030. Federico Belotti
Commembras e commembers dal «cunsegl gioven».
Legenda: Commembras e commembers dal «cunsegl gioven». mad
audio
Per tadlar: curt e cumpact
aus RTR Audio vom 26.04.2022.
abspielen. Laufzeit 1 minuta 4 Sekunden.

RTR novitads 06:00

Artitgels legids il pli savens

Scrollar a sanestra Scrollar a dretga