La davosa festa da Son Silvester ha mussà che blera glieud s’empipa dal scumond da material pirotecnic. Suenter la notg da Son Silvester aveva la vischnanca da Surses scrit sin sia pagina d’internet: «Deplorablamain è il tschiel durant la notg da Son Silvester betg vegnì sclerì mo da stailas, mabain era d’ina pluna fieu artifizial». Perquai vul la vischnanca da Surses ussa en vista al Prim d’avust infurmar meglier. Cun tavlas d’infurmaziun, chanals digitals e stampads, vul la vischnanca infurmar meglier davart il scumond da fieus artifizials.
Multas per ils pirotecnicists
Quels che na sa tegnan betg vi da la lescha ston quintar cun multas a partir da 300 francs. Sco quai che Daniel Wasescha, il president communal ha ditg sin dumonda dad RTR, vegnia il policist communal a girar la saira dal Prim d’avust tras il Surses. Perquai che la vischnanca n’ha nagina lescha da polizia, stoppia il policist u era persunas privatas scriver a la vischnanca, sche la lescha na vegn betg respectada. Sin basa da quai vegn la suprastanza communala a decider sche e quant che sto vegnir pajà. La vischnanca da Surses pondereschia en l’avegnir da far ina lescha da polizia. Cun quella fissi pussaivel da dar multas direct al lieu, ha ditg Daniel Wasescha.
