Breil scumonda fieus artifizials strictamain
Avant la pandemia aveva Breil in lieu, per ch'ils giasts ed indigens possian arder fieus artifizials. Avant quatter onns è quai dentant sa midà. Quai dat er en egl, sch'ins cloma si la homepage da la vischnanca. Là èsi scrit cler: «scumond d'arder fieus artifizials». Per Clau Schlosser, president communal ina clera chaussa.
Motivs èn l'ambient, la natira, animals e la setgira. Adina puspè ha Breil stuì scumandar fieus artifizials, cunzunt pervia da la setgira la stad. Il privel da fieu era memia aut. Uschia ha la vischnanca decis da relaschar ina nova lescha da polizia. Tenor il president communal Clau Schlosser na vul la populaziun sco era ils giasts per gronda part nagin fieu artifizial pli. Er ils possessurs da chauns beneventan quai scumond or dal motiv da canera.
Fin ussa avain nus udì bunamain mo buns resuns sin nossa decisiun.
Singuls che vulan laschar ir lur rachetas, ardan lur fieus artifizials da tschella vart da la vallada. Sursaissa n'haja numnadamain nagin scumond, di Clau Schlosser. L'experientscha durant ils quatter onns è buna tenor il president communal. Els n'han fin uss betg chastià insatgi. Ina patruglia da Securitas admonescha glieud che arda fieu artifizial.
Quest onn porscha la vischnanca da Breil in grond fieu, durant il di in program d'uffants e festa cun musica da saut.
Zernez na scumonda betg fieus artifizials
Bleras vischnancas en l'Engiadina han in scumond da fieus artifizials. Betg Zernez.
Quai che nus na faschain dentant betg è da scumandar a la glieud ils fieus artifizials.
Tenor Domenic Toutsch, president communal da Zernez n'è il scumandar betg realistic. Ins stuess controllar dapertut ed ins stuess dar multa a tut las persunas che na sa tegnan betg vi da quellas leschas. Uschè in grond sforz na vulan ins betg far a Zernez. «Persunas che fan tuttina fieu artifizial fan quai uschè u uschia», di Domenic Toutsch. I saja mo durant Silvester ed il prim d'avust e quai na fetschia betg grond donn.
Perquai lubeschia Zernez fieus artifizials. Els hajan era in lieu surveglià da pumpiers per tut tgi che vul, per dar la pussaivladad dad arder fieu artifizial.
Noss prim d'avust faschain nus en la sala da gimnastica. En ina zona definida sin il prà dal chastè avain nus bischens betunads en la terra, nua ch'ins po laschar ir rachetas. Quai è ina mesira da segirezza.
Avant la pandemia haja la vischnanca da Zernez anc fatg fieu artifizial. Ils custs èn stads fitg auts. 5'000 fin 6'000 francs custava il fieu artifizial mintg'onn. Quai è in dals motivs, pertge ch'els han chalà cun quai. Ma scumandar na vulan els betg quai.
Era sche las opiniuns davart il tema èn differentas tar las vischnancas, han Breil e Zernez insatge communabel. Omadus discutan, sch'ins vul porscher en il futur insatge alternativ als fieus artifizials. Per exempel: show da dronas u show da laser.
