Cun 40% han tuttina blers da las votantas e votants da Surses votà cunter il project. L'iniziant da la tur als Mulegns valitscha il resultat uschia:
Nus discurrin qua da projects ch’èn propi novs, da projects dals tals ins n’ha anc nagina experientscha, ed ins po era avair segns da dumondas. Quels vegnan formuladas en in process public, da la nossa vart vai la fin da persvader era quels ch’èn magari stads sceptics a l’entschatta, per ch’i dettia in project ch'è bun per tuts
Cun il resultat è Giovanni Netzer fitg cuntent sco ch’el ha ditg suenter la radunanza communala envers RTR. Ins haja en l’istorgia d'Origen ils davos 17 onns adina puspè gì votaziuns communalas ed adina gì in grond sustegn per ils projects ch’ins haja vulì far. Quai fetschia bain e dettia il curaschi e mussia che la via possia esser ina che duessi la fin vegnir da bun a blers.
Critica en las gasettas
Il davos temp hai dà diversas brevs da lecturs cun diversa critica envers Origen e ses intendant Giovanni Netzer ed ils plans da questa tur amez vischnanca dals Mulegns. Il tenor da la critica: Origen po far e sa lubir tut ed ils privats betg. In’analisa da questa critica ha fatg il redactur da RTR, Tona Poltera.
Edifizi bajegià cun elements da betun
La tur alva a Mulegns duess servir sco edifizi per occurenzas culturalas. La furma regorda e raquinta dals pastiziers grischuns ch’han influenzà il maletg da la vischnanca Mulegns. La tur è planisada e limitada sin tschintg onns. Actualmain fa la Scola politecnica da Turitg, ETH, tests cun in stampader digital che duai producir ils elements da betun, per part direct al lieu a Mulegns. La glieud duai pudair contemplar al lieu co che la nova tur vegn construida. Sco quai ch’il manader dal project, il professer Benjamin Dillenburger da la ETH ha ditg, saja la qualitad dal stampader da betun gia uschè buna ch’ins pudessia construir la tur.
Sche quella po lura propi vegnir bajegiada, dependa anc dal consentiment dal chantun, plinavant dovra quai er anc ina lubientscha da bajegiar. Sche tut va tenor plan duess la tur vegnir erigida l’onn 2023.
Nova plazza da sport per Savognin
Plinavant ha la radunanza communala da Surses da glindesdi saira decidì cun 213 cunter 2 vuschs davart in project d’investiziun per plazzas da sport a La Nars a Savognin. Per 4,5 milliuns francs duessan vegnir construidas trais plazzas da tennis ed in glatsch l’enviern al medem lieu. Ina nov’ustaria duai remplazzar l’ustaria existenta da La Nars. La fatschenta sto anc vegnir approvada a l’urna ils 13 da mars.
Nov local da pumpiers
Cun 187 tar 14 vuschs ha la radunanza communala decidì davart in credit da 1,4 milliuns francs per sanar e transfurmar l’anteriura chasa da scola a Bivio en in local da pumpiers ed ina sala polivalenta.
Lavuratori communal a Cunter e betg a Savognin
Ultra da quai ha il suveran da Surses decidì davart il lieu, nua ch’il nov lavuratori da Surses duess vegnir construì. Betg sco proponì da la suprastanza communala a Savognin, mabain a Cunter duess il nov lavuratori vegnir construì. Per quest intent duess la vischnanca cumprar l'areal cun il lavuratori da «Von Büren restaurieren». La deponia da Davos Fallung duess restar a Davos Fallung a Savognin, ha ditg il president communal Leo Thomann. En discussiun per in nov lavuratori èn anc stads dus auters lieus, numnadamain a Cunter/Gravas ed a Savognin a Lecsch/Davos Fallung.
