La via dal sviament provisoric saja schon pulit taissa manegia Dario Cantieni, ch'è ensemen cun ses bab responsabel per rumir la naiv. La via cun ina pendenza da 14.5% è en in lieu cun normalmain blera naiv e sumbriva ed uschia vegnan els a stuair passar pli savens per bittar sal. Grazia al camiun cun tracziun da 4x4 ed en mender cas cun montar chadainas na saja quai dentant segir nagin problem. E cuntent saja el er ch'il sviament cun ina lunghezza da circa 100 meters haja ussa er ina saiv da segirezza – il sviament integrà per part en la via existenta a Dumagns haja in pendenza vers la val – er sche la via saja schelada saja quai bain er in lieu da passar cun precauziun.
Il sviament provisoric duai restar per almain tschintg onns, di Christian Hartmann, il manader dal project da l’Uffizi da construcziun bassa. Ils custs per quest provisori muntan a circa 700'000 francs. A lunga vista dovria quai dentant ina meglra schliaziun, per exempel in’autra ruta da la via, in tunnel u ina punt che traversa il lieu da la bova.