Da professiun oriunda è Christian Widmer cuschinier. Suenter ha el fatg la scolaziun da sculptur da lain en Part Sura Bernaisa. Tatuar vuleva el gia lura avant passa 20 onns, ma è dentant l'emprim sa decidì da far insatge creativ cun laina perquai che quai haja er gia adina interessà el. Avant tschintg fin sis onns è l’idea da l'agen studio da tattoo daventada pli concreta. El haja puspè cumenzà a malegiar dapli.
L’entschatta a chasa en tschaler
Entschet a tatuar haja el cun pitschens zaps. Malegià ha el mintga saira, e suenter circa in onn cumprà ina maschina da tatuar e fatg las emprimas emprovas sin differentas pels d'animals, sin fritgs, e spert er sin l'atgna pel, per exempel sin il schanugl.
El ha lura bajegià enturn ses tschaler a chasa, nua ch'el fascheva avant lavurs da stgalprar cun lain – isolà e mess en in nov palantschieu ed installà in pitschen studio da tattoo.
Spert èn amis e famiglia ed adina daplirs vegnids che vulevan in tattoo da mai.
Suenter in u dus onns haja el sentì ch'el stuess tschertgar in local. Igl ha cuzzà in mument enfin ch'el ha la fin finala avant in onn chattà in local en la part veglia da la vischnanca da Tusaun. L'entschatta matg 2024 ha Christian Widmer pudì festivar l'avertura da ses studio «Snailhouse Tattoo».
Snailhouse Tattoo – il studio da Christian Widmer
-
Bild 1 von 5. Il studio da Christian Widmer sa chatta en la part veglia da la vischnanca da Tusaun. Bildquelle: RTR.
-
Bild 2 von 5. Sin quella sutga vegn tatuà. Bildquelle: RTR.
-
Bild 3 von 5. Intgins tattoos che Christian Widmer ha dissegnà. Bildquelle: RTR.
-
Bild 4 von 5. Art da Christian Widmer en ses studio da tattoo. Bildquelle: RTR.
-
Bild 5 von 5. Tatuar e dissegnar, las passiuns da Christian Widmer. Bildquelle: MAD.
La dretga decisiun
Fin oz n'haja el mai s’enriclà d'avair ristgà quel pass – anzi, ses studio da tattoo marschia pulit. Christian Widmer è fitg cuntent sco la fatschenta marscha. Ed in onn suenter l'avertura di el ch'el saja fitg led d'avair fatg quel pass. Actualmain lavura el trais dis per emna en ses studio da tattoo e trais dis lavura el sco restauratur da mobiglia veglia grischuna.
Sia clientella saja multifara, giuvna, vegn da datiers e da pli lunsch davent. Per exempel vegnian enconuschents da Turitg aposta a Tusaun per laschar tatuar dad el. Per l'um da 43 onns è tatuar dapli che in hobi u ina professiun.
Tatuar è mia passiun. Jau poss lavurar fitg creativ, exact ed hai contact cun la glieud.
El na saja betg exnum spezialisà sin in stil da tattoos. Fitg gugent fetschia el dentant per exempel tattoos realistics d'animals en colur ubain cartoons u «Sketch Tattoos», qua saja in stil da tattoos che vesia or sco ina skizza. Er chaussas celticas fetschia el fitg gugent. I dettia fitg bler ch'el fetschia gugent, ed el saja adina avert per novas ideas.
Mintga giavisch n'adempliss el dentant betg. Sch'i saja in stil da tattoo fitg explicit sco per exempel geometric fiss el la fallada persuna. Per quai dettia tatuaders che sajan sa spezialisads. Era portraits da fatschas na faschess el betg, er là dettia tatuaders spezialisads. Simbols politics na tatuescha Christian Widmer da principi betg. Er sch'insatgi vuless ses emprim tattoo ad in lieu ch'è adina bain vesaivel sco per exempel il culiez u il maun stuess el refusar la dumonda. Quai sajan tenor el tattoos per persunas che hajan gia ina massa e forsa er per da quels che hajan gia in u dus onns dapli sin il dies.
Sa chapescha che er la pel dal tatuader passiunà è ornada cun varsaquants tattoos. Il pli emprim saja stà in scorpiun avant passa 25 onns.
Quants tattoos che jau hai sez na poss ja betg dir exact – insacuras hai jau chalà da dumbrar. Ma in zic plaz hai schon anc.