La regiun da Vaz è amez ina regiun da terratrembel tranter Sargans, Scuol e la Val Bregaglia. Il november 1991 ha la terra stremblì cun ina fermezza da 4,7 uschia ch'i ha dà donns vi da la baselgia da Muldain ch'ins aveva gist restaurà. Il terratrembel cun epicenter Vaz è er l'ultim che vegn manà dal Servetsch seismologic Svizra sco terratrembel cun donns.
Leo Sigron sa regorda
Il 1991 era el polier e questa funcziun aveva el terminà l'onn avant las lavurs da restauraziun da la baselgia da Muldain. La notg a las 11 cura che la terra ha stremblì saja stà in mument da tema, sa regorda Sigron. «Mai avant e mai suenter», haja la terra a Vaz stremblì talmain sco là. Tuttina ins s'encorschia adina puspè levs terratrembels en la regiun. Quai sa mussa er vi da las fatschadas da las baselgias da Zorten e Lain. «Là ins vesa che la terra trembla adina pupè» resumescha Sigron, ch'è stà ils davos nov onns president dal cumin baselgia da Vaz.
