RTR ha visità il campadi da Casti che sa chatta sisum il vitg. Là ha nossa redactura Ronja Muoth discurrì tranter auter cun Iris Simonet. Ella, ses um ed il frar da ses um mainan in campadi. Quest campadi porscha spazi per 15 plazs da stagiun e 10 fin 15 plazs da turists.
Il campadi «Cumpogna» è dal 1952, ils geniturs dals dus manaders dad oz, Angelo e Stefano Simonet, han mess en pe quel. Uss mainan ils dus frars quest campadi ensemen cun lur famiglias, quai dapi l'onn 1993.
Il boom sentan era els
Il boom da campar sentan era ils gestiunaris dal campadi a Casti. Els n'hajan anc mai gì uschè blers Svizzers sco quai onn. Normalmain sajan lur giasts da la Germania, Frantscha, Italia, America u autras naziuns. Quest onn è quai dentant auter, ha declerà Iris Simonet.
Uss survegnian els mintgadi var quatter telefons cun dumondas, sch'els hajan anc plaz. Quai saja era insatge nov per els. Normalmain vegnevan ils giasts semplain spontan sperasora. Era spezial saja che blers che telefoneschian, na vegnian la finala lura gnanc tar els sin il campadi.
I para sco sche la glieud vuless malgrà corona ir en lieus ch'èn gia plains. Igl è u curius.
