Siglir tar il cuntegn
Ein Industriegebäude an einem Bach.
Legenda: La centrala da l'ovra electrica a Tinizong. FMR

Tinizong Nov concessiunament da l'Ovra electrica

La vischnanca da Surses ed il chantun Grischun fundeschan ensemen la societad da project Ovras Electricas Tinizong SA. Quella vegn creada en vista a la renovaziun da la concessiun da l’ovra electrica da Tinizong che scada il matg da l'onn 2035.

La decisiun sa basa sin la strategia chantunala da la forza idraulica ch'ha la finamira da participar pli fitg il maun public vi da la forza idraulica grischuna. Il chapital d’aczias da la nova societad anonima munta a 100'000 francs, la vischnanca ed il chantun pajan mintgamai la mesadad. En il cussegl d’administraziun datti mintgamai in represchentant da la vischnanca ed in dal chantun, sco er ina terza pesuna. L’Ovra electrica da la citad da Turitg EWZ maina l’ovra che nizzegia l’aua dal Lai da Marmorera dapi l'onn 1955, la durada da la concessiun è 80 onns.

EWZ n'è betg cuntent

L'0vra electrica da Turitg EWZ sa mussa reservà areguard la fundaziun da la nova societad da project «Ovras Electricas Tinizong SA». Sco partenari fidà dapi blers onns ed anteriur concessiunari en la regiun, avess l'EWZ giavischà in proceder pli cooperativ, scriva l’interpresa sin dumonda. L'interpresa saja dapi blers onns engaschada en il chantun Grischun e dettia lavur a radund 120 collavuraturs e collavuraturas en la regiun. A quels veglia l’interpresa uss uschè spert sco pussaivel dar ina perspectiva clera. Medemamain punctuescha la EWZ ch’ella saja pronta da vinavant surpigliar responsabladad – e quai cun l'experientscha cun ovras idraulicas, cun la vendita d’energia e cun emploiadas ed emploiads cumpetents.

Naginas investiziuns en il mir da fermada da Marmorera

Malgrà ils svilups novs parta l'EWZ dal fatg che l’auzament previs dal Lai da Marmorera restia pussaivel. Tuttina na dettia naginas investiziuns ulteriuras uschè ditg ch’i na saja betg cler, sche l'EWZ possia manar vinavant las ovras electricas era a partir dal 2035. Il mument na vegn pia betg planisà vinavant.

RTR novitads 12:00

Artitgels legids il pli savens