La resgia duai daventar dal tut digitala, cun pauc lavur manuala. Enfin 70'000 m³ lain duai la nova resgia pudair elavurar mintg’onn. En in'emprima fasa duain vegnir elavurads 30'000 fin 40'000 m³. Da la vischnanca da Surses duai derivar l’entir tagl annual da mintgamai 8000 m³ – ulteriurs contracts datti cun pliras autras vischnancas. Però era firmas privatas sco Florinett, Thomann e Hemmi vegnan a furnir passa 10'000 m³ lain ad onn per la resgia.
La resgia nova custa passa 22 milliuns francs, e vegn finanziada sin basa privata. Dasper la resgia vegn bajegià in pavigliun d’infurmaziun ch’è collià cun ina passarella cun la resgia.
Fundaziun «pigna verde» duai sensibilisar e construir rempars
En connex cun il project «resurses2025» vegn plinavant fundada la fundaziun «pigna verde». Quella ha la finamira da sensibilisar la populaziun en la regiun muntagnarda per ils problems da l’ambient. Reussir duai quai tranter auter cun emplantar plantas ch’èn resistentas al clima. Era duai la fundaziun construir rempars cunter lavinas e cunter crudada da crappa.
Ord l'archiv
Plans e visiuns - resgias grondas a Domat.
