Dapi 10 onns repara e sanescha il Parc Ela gia mirs sitgs. Sin 35 plazzals sajan gia vegnidas fatgas 40’000 uras da lavur, e 3'900 tonnas crappa saja vegnida duvrada, scriva l’uniun Parc Ela en ina communicaziun.
Legenda:
Las medias, sponsurs e fauturs han pudì guardar co ch'i vegn bajegià in mir sitg.
RTR, Federico Belotti
2 / 13
Legenda:
Per far in mir sitg dovra quai fitg blera crappa.
RTR, Federico Belotti
3 / 13
Legenda:
Per ch'in mir sitg tegna, ston ils lavurants far lavur fitg exacta.
RTR, Federico Belotti
4 / 13
Legenda:
Tut quests mirs sitgs a Buorchas sur Bravuogn ha il Parc Ela bajegià e sanà.
RTR, Federico Belotti
5 / 13
Legenda:
In dals mirs sanads.
RTR, Federico Belotti
6 / 13
Legenda:
Bajegiar in mir sitg pretenda blera crappa cun differentas grondezzas e furmas.
RTR, Federico Belotti
7 / 13
Legenda:
Tscherts craps dals mirs sitgs a Buorchas èn plirs tschients kilos grevs.
RTR, Federico Belotti
8 / 13
Legenda:
Las medias e sponsurs èn stads envidads a Buorchas.
RTR, Federico Belotti
9 / 13
Legenda:
Per mantegnair la biodiversitad n'èn las chaglias tranter ils dus mirs betg vegnidas allontanadas.
RTR, Federico Belotti
10 / 13
Legenda:
Alfred Gantenbein, il manader da project Natira e Tgira da la cuntrada declera tge ch'il Parc Ela ha realisà a Buorchas sur Bravuogn.
RTR, Federico Belotti
11 / 13
Legenda:
Dino Augustin lavura gia blers onns per il Parc Ela sco expert da mirs sitgs.
RTR, Federico Belotti
12 / 13
Legenda:
Paolo Giacometti, il president dal Parc Ela.
RTR, Federico Belotti
13 / 13
Legenda:
Vegnì a la preschentaziun è era il president communal da Bravuogn Filisur Luzi Schutz.
RTR, Federico Belotti
Paolo Giacometti, il president dal Parc Ela ha ditg envers RTR, ch’i saja in’impurtanta incumbensa per in parc da natira da cultivar e mantegnair la cuntrada, ed uschia era ils mirs sitgs che sajan in element istoric. I valia da mantegnair questa perditga. E quai betg mo ord motivs ecologics, mabain era ord motivs istorics. Ils mirs raquintian ensemen cun la cuntrada ina istorgia ed i valia la paina da sa dar giu cun questa istorgia.
Mirs èn impurtants per la biodiversitad
A Bravuogn Buorchas èn ils davos onns vegnids sanads radund 265 meters mirs sitgs, sulet questa stad eran quai radund 80 meters. Ils mirs sitgs da Buorchas hajan gì diversas funcziuns, ha ditg Dino Augustin, expert da mirs sitgs dal Parc Ela. Entschet haja tut cun prender davent la blera crappa or da las pastgiras per avair dapli erva, e suenter hajan ils purs nizzegià la crappa per construir mirs che tegnan enavos il terren e per tegnair la via stabila.
En in auter lieu da Buorchas hajan ils mirs gì la funcziun da tegnair ensemen la muaglia cura che quella gieva d’in lieu en in auter. Ils mirs sitgs sajan impurtants era per ils animals, sco pitschens insects, rustgs, serps e mieurs, era dettia quai utschels che fetschian lur gnieus en las rusnas dals mirs, ha ditg Dino Augustin.
audio
3’900 tonnas crappa per mirs sitgs en il Parc Ela
06:22 min, ord Total local dals 24.08.2020.
Maletg: RTR, Federico Belotti
laschar ir. Durada: 6 minutas 22 Secundas.
Era en l'avegnir vegnan sanads mirs sitgs
Il Parc Ela vegn a sanar era en l’avegnir mirs sitgs: Per ils onns 2020-23 planisescha il Parc Ela da sanar 1200 meters mirs sitgs, per part saja la finanziaziun gia garantida scriva il parc. Ils davos diesch onns ha il Parc ela investì 1.2 milliuns francs en ils mirs sitgs. 15% ha pajà il parc, il rest è vegnì finanzià dal maun public e da fundaziuns e sponsurs.
