Siglir tar il cuntegn

Header

audio
Il Lai da Lüsch perda aua
Or da Actualitad dals 20.12.2022. Maletg: Runals Tschappina Heinzenberg
laschar ir. Durada: 2 minutas 44 Secundas.
cuntegn

Tschappina/Heinzenberg Lai da Lüsch perda aua

L’anteriur Lai da Lüsch è la stad puspè vegnì emplenì. Quai l’emprima giada suenter passa 100 onns. La finamira: Nizzegiar l’aua per producir naiv tecnica. Dals oriunds 30’000 – 35’000 m³ aua, èn dentant restads mo circa 2’000 m³, conferman ils Runals da Tschappina.

Deplorablamain saja il nivel dal lai sa reducì fermamain dapi il mez d’avust, uschia ch’il niz per ennavar tecnicamain saja quest onn stà mo minim. Quai di Hanspeter Grass, il president dal cussegl d’administraziun dals «Runals da Tschappina Heinzenberg». Questa reducziun dal livel dal lai possian ins declerar tras la stad sitga e chauda. Bler’aua saja probablamain era sfundrada.

L'analisa geologica marscha

Cun in geolog vulan ils runals ussa analisar las datas ed il svilup. Sch’i dovria mesiras, vulan ils runals decider pli tard. Hanspeter Grass di ch’i saja era pussaivel da tegnair l’aua l’auter onn senza mesiras. I saja tgunsch pussaivel ch’il lai saja en il segund onn pli ferm.

Dus lais per producir naiv

Per nizzegiar l’aua dal Lai da Lüsch per producir naiv tecnica, è vegnida installada ina lingia d’aua. Quella va en il lai artifizial che vegn gia nizzegià plirs onns per la producziun da naiv tecnica. Ma là è la capacitad limitada. Perquai vulan ils Runals da Tschappina Heinzenberg nizzegiar era il Lai da Lüsch sco segund lai d’accumulaziun.

Lai n'è betg responsabel per las bovas

Avant dapli che 100 onns era il Lai da Lüsch sin la Mantogna / Heinzenberg vegnì svidà, perquai ch’ins supponiva che ses scul saja responsabel per las bovas en il conturn da Nolla. Ozendi èn il geologs da l’opiniun ch’il Lai da Lüsch n’ha nagin’influenza sin il terren.

RTR actualitad 12:00

Artitgels legids il pli savens

Scrollar a sanestra Scrollar a dretga