Turissem d'enviern - Uniun Skateline Alvra duess vegnir schliada

A la radunanza da commembers da gievgia saira ha l'uniun Skateline Alvra prendì la decisiun da princip da schliar l'uniun. Sco quai ch’il cassier Luzi Schmid ha ditg envers RTR suenter la radunanza, duess quel process esser terminà il pli tard en dus onns e cuntegnair la liquidaziun da tut las valurs da facultad.

Ils giuvens mancan

Il motiv principal per quest pass è tenor la suprastanza las difficultads adina pli grondas da chattar novs commembers e gidantras voluntarias. Las commembras ed ils commembers da fundaziun hajan en il fratemp tranter 75 ed 80 onns, forzas pli giuvnas na sa laschian strusch gudagnar.

Leschas èn midadas

Engrevgiantas sajan vegnidas cundiziuns giuridicas en il spazi d'auas che cumplitgavan supplementarmain il manaschi dal traject da glatsch. Uschia ha tranter auter stuì vegnir dismessa ina pitschna pizzaria tar l’arrivada.

Nagin intent da far profit

La Skateline Alvra, che sa chapiva adina sco project senza finamira da rendita, viveva fermamain da l'idealissem da sias commembras e da ses commembers. Ils pretschs d'entrada èn restads durant onns medem auts. Suenter in punct culminant avant la pandemia da corona è l'interess public vi da la skateline dentant sa reducì cleramain.

Malgrà sustegn nagin futur

Malgrà il sustegn da las organisaziuns regiunalas da turissem e da differentas vischnancas n'han ils ultims onns pudì ni avunda persunal ni ina soluziun solida per cuntinuar cun il manaschi. Uschia resta la via da glatsch ch'è serrada dapi l'enviern 2019/20 probablamain er en il futur istorgia.